Ссылки доступа

Қирғизистон жанубида Раимбек Матраимовни қўллаб-қувватлаш учун митинг бўлиб ўтди


Ўш шаҳрида Давлат божхона хизмати бошлиғининг собиқ ўринбосари Раимбек Матраимовни қўллаб-қувватлаш учун 28 февраль куни бўлиб ўтган митинг якунланди.

Акция ташкилотчиларининг сўзларига кўра, ўша куни жанубий пойтахтнинг марказий майдонига 15 мингга яқин одам йиғилган. Мустақил кузатувчилар 5 мингга яқин иштирокчини ҳисоблашди. Ҳуқуқни муҳофаза қилиш идоралари ҳанузгача намойишчилар сони тўғрисида хабар бермаган.

Йиғилганлар орасида “Мекеним Қирғизистон» партиясининг рўйхати билан 2020 йилги парламент сайловларида депутатликка номзод бўлган Жўқорғи Кенгес депутатлари ҳам бўлган. Булар парламентнинг собиқ вице-спикери Мирлан Бакиров, шунингдек депутатлар Таабалди Тиллаев, Бақтйбек Раимқулов, Илҳом Маннанов ва Искендер Матраимовлардир. Уларнинг барчаси ва қолган намойишчилар Раимбек Матраимовнинг озод қилинишини талаб қилишди.

Раимбек Матраимов 18 февраль куни пул ювиш ишдиа гумон қилиниб, Миллий хавфсизлик давлат қўмитаси томонидан ҳибсга олинган. 20 февраль куни у Бишкекнинг Первомайский туман судининг қарори билан икки ой муддатга Миллий хавфсизлик давлат қўмитасининг ҳибсхонасига жойлаштирилди.

Бу собиқ божхона ходимининг иккинчи ҳибсга олиниши. Аввалроқ у коррупцияда гумон қилиниб ҳибсга олинган, ўшанда у тергов билан битим тузган ва давлатга 2 миллиард сом миқдорида моддий зарарни қоплаган. Бишкек шаҳрининг Первомайский туман суди уни 319-модда («Коррупция») бўйича жиноят содир этганликда айбдор деб топди ва 260 минг сом жаримага тортди.

9 декабрь куни Қўшма Штатлар Магнитский глобал рўйхатига Раимбек Матраимов ва унинг рафиқаси Уулкан Турғуновани киритгани маълум бўлди.

XS
SM
MD
LG