Ссылки доступа

Бухорода “арзон совға” учун талабаларга таҳдид қилган университет ўқитувчиси ишдан ҳайдалди


Талабалардан 8 март муносабати билан олган 300 минг сўмлик совғасини арзимас деб баҳолаб, уларга таҳдид қилган Бухоро давлат университети ўқитувчиси ишдан олинган. Бу ҳақда Олий ва ўрта махсус таълим вазирлиги ўз Телеграм-канали орқали маълум қилган.

Университетнинг Мактабгача ва бошланғич таълим факультети талабалари гуруҳ кураторига Халқаро хотин-қизлар куни муносабати билан гулдаста ва 200 минг сўм пул ҳадя қилишгани, совғанинг арзонлигидан хафа бўлган ўқитувчи “энди ҳаммаси бошқача бўлади” дея таҳдид қилгани ҳақида аввалроқ блогер Умид Ғафуров ўзининг Troll.uz Телеграм-канали орқали хабар тарқатган ва вазирликдан мазкур муаммога эътибор қаратишни сўраган.

Бошқа талабалар шунга ўхшаш ҳолатларга учраса, менга хабар беришлари мумкин. Таълим тизимини биргаликда даволашимиз керак”, деб ёзган бухоролик блогер.

Олий ва ўрта махсус таълим вазирлиги ҳолат ўрганилганидан сўнг “мазкур ўқитувчи билан тузилган меҳнат шартномаси Ўзбекистон Республикаси Меҳнат кодексининг тегишли моддасига мувофиқ бекор қилинди”, дея маълум қилган.

Вазирлик тизимда коррупциянинг ҳар қандай кўриниши ҳамда манфаатлар тўқнашувига нисбатан муросасиз муносабатда бўлиши, шу кунларда олий таълим тизимида коррупцияга қарши "комплаенс назорат" тизими жорий этилаётганини қайд этиб, "жамоатчилик назоратини амалга оширган ижтимоий тармоқ вакиллари ва талабаларга миннатдорчилик" билдирган.

XS
SM
MD
LG