Ссылки доступа

Қырғыз президенті: Сох анклавына дәліз берілді деген ақпарат жалған


Бұл туралы Қырғызстан президенті Садыр Жапаров 15 наурызда Азаттықтың қырғыз қызметіне арнайы сұқбат берген кезде айтты.

Ол Өзбекстанға барған мемлекеттік сапарында көрші елдің президенті Шавкат Мирзияевпен екі елдің шекара мәселесін 3 айдың ішінде толық шешу туралы сөйлескенін айтты.

Оның сөзінше, 24-25 наурыз күндері Ұлттық қауіпсіздік жөніндегі мемлекеттік комитеттің төрағасы (ҰҚМК) Камчыбек Ташиев Өзбекстанға барып, тиісті құжаттарға қол қойып келеді.

Садыр Жапаров Өзбекстанның Сох анклавына байланысты сұрақтарға да жауап берді.

"Біз Сохқа әуе қатынас ашып береміз дедік. Одан басқа өткізу бекеттерін ғана ашамыз. Интернетте оппозиционерлер, ойы бұзық адамдар "Сохқа дәліз береді екен. Жол ашады екен, суды береді екен" деген жалған ақпарат таратып жатыр. Бұл дұрыс емес. Оның үстіне Унгар-Тоо (Үңгір тау) бойынша Шавкат Мирзияев "біз таласпаймыз, сіздерге тиесілі бола берсін деп айтты", - деді қырғыз президенті.

Қырғызстан мен Өзбекстан арасындағы шекарада әлі шешімін таппай келе жатқан Жалал-Абад облысы Аксы ауданында орналасқан Үңкүр-Тоо да бар. Ол жерде Қырғызстанға тиесілі РРС-24 "Кербен" радиорелейлік станциясы орналасқан. 2016 жылы Өзбекстан бұл аймақ өзіне қарасты екенін білдірген.

Садыр Жапаров 11-12 наурыз күндері Өзбекстанға мемлекеттік сапармен барып келді.

XS
SM
MD
LG