Ссылки доступа

Қазақстан Ресейден "Спутник V" вакцинасын бастапқы бағамен сатып алады


Қазақстанның денсаулық сақтау министрлігі Ресейдің "Спутник V" вакцинасын осыған дейінгі келісілген бағамен сатып алуда. Осылай деп 17 наурызда мекеме басшысының орынбасары Ерлан Қиясов мәлімдеді.

Ақпан айында Ресейде аталған вакцина бағасы төмендетілгені хабарланған.

"Келісім бұрынғы келісілген бағамен құрылған. Ресей үкіметі "Спутник V" вакцинасының бағасын өз елінде ғана төмендету туралы шешім қабылдаған. Сыртқа сатылатын вакцинаны арзандату қарастырылмаған. Бірақ біз үшін де бағаны түсіреді деген үміт бар", - деді Қиясов.

Бүгінгі күні Қазақстанды дәрі-дәрмекпен қамтамасыз ететін "СК-Фармация" компаниясы Қарағанды фармацевтикалық кешенінде шығарылған "Спутник V" вакцинасын 26 доллардан (10 868 теңге) сатып алып жатыр.

Ресми мәлімет бойынша, бүгінгі күнге дейін Қазақстанда "Спутник V" вакцинасының бірінші компонентімен 83 мың, екінші компонентімен 19 мың адам емделді.

Ресейдің "Спутник V" вакцинасын салу 1 ақпаннан басталған. Оған 17 миллиард теңге бөлінетіні хабарланған.

XS
SM
MD
LG