Озодликка юборилган видеода "Жиззах Петролеум" МЧЖнинг юздан зиёд ишчиси ширкат раҳбарларини ойликлари нега камайиб кетгани борасида саволга тутаётгани акс этган.
“5-разрядман, март ойига 1 миллион тўрт юз минг сўм ойлик чиқди. 15 кунлик сменада ётиб ишлаймиз. Болангиз касал бўлса қанча пул кетади. 1 миллион сўм уйимга, 246 минг сўм боламни ўқишига тўлайман. Газ йўқми, свет йўқми, емаймайнми, ичмайманми”, - дейди ишчилардан бири.
Ширкат раҳбарлари эса ғазабга тўлган ишчиларга ойликлари масаласини ҳал қилиб беришини айтиб, уларни тинчлантиришга уринади.
“Жиззах Петролеум” МЧЖнинг исми айтилмаслигини сўраган ишчиси Озодликка ¸ видеода акс этган воқеа 9 апрель куни бўлганини билдирди.
“Ўша куни Телеграм орқали йиғилиб, иш ташлаш эълон қиладиган бўлдик. 100га яқин ишчи бир жойга тўпланиб, хат қилиб, раҳбариятга имзо қилиб бердик. Кечки сменада ишга чиқилмади. Ўша кунни ўзида Тошкентдан одамлар келди. Ҳамма дардини айтди. Янги йилдан буён ойликлар икки баравар камайиб кетган, фақат рабочийларники. 4 миллион сўм олган бўлса 2 миллион, 3 миллион олган бўлса шуни ярми бўляпти. Мажлис бўлди, Тошкентдан келган катталардан бири бу ердаги раҳбарни ўзгартираман, ойликлар аввалги ҳолатига қайтади, деб кетди. Лекин, бир ҳафта бўляпти, ўзгариш йўқ. Агар ваъда бажарилмаса, иш ташлаймиз деб турибмиз, - дейди ишчи.
“Жиззах Петролеум” раҳбарияти ишчилар ойлиги кесилишини нефт қазиб олиш камайгани билан изоҳламоқда.
Корхонанинг исми очиқланмаслигини истаган кадрлар бўлими ходими Озодлик билан суҳбатда жорий йил бошида ширкат таъсисчилари ўзгаргани сабаб барча ишчилар ойликлари қисқариши ҳақида огоҳлантирилганини айтди.
“Тошкентдан хат келганди. Ширкат бошқа қўлга ўтгани ҳақида. Шу хат асосида ҳамма ишчилар билан бошқатдан шартномалар имзоладик ва ўша шартномадан ойликлар қисқариши маълум эди. Ҳаммаси рози бўлиб имзолашган, ҳеч ким мажбурламаганди ўшанда”, - дейди “Жиззах Петролеум”нинг кадрлар бўлими ходими.
Лекин ишчилардан бири: “Нефть камайган бўлса нега ҳамма удар қора меҳнат қиладиган ишчиларга келяпти. Нефт камайганига биринчи бўлиб раҳбар жавоб бериши керак-ку. Компанияни эгаси ўзгарса, бизни айбимиз эмас-ку. Бошлиқларни ойлиги камаймаган. Ишни қиладиганларни ойлигини қирқиб, қозонни тепасида қараб турганларники ўзгармаяпти”, - дейди.
“Жиззах Петролеум” қўшма корхонаси “Ўзбекнефтгаз” АЖ ҳамда Россиянинг “Газпром” ширкати тузилмаси ҳисобланган Gas Project Development Central Asia ширкати иштирокида 2017 йилда ташкил этилган эди.
Жиззахда йилига 5 миллион тонна нефтни қайта ишлайдиган янги нефтни қайта ишлаш заводини қуриш режаси барбод бўлгач, “Ўзбекнефтгаз” ўтган йил “Жиззах Петролеум”даги улушини 30 фоизгача камайтиришини эълон қилди.
Шу йил февраль ойида эса Ўзбекистон президентининг “Давлат иштирокидаги корхоналарни жадал ислоҳ қилиш ва давлат активларини хусусийлаштириш тўғрисида”ги фармони асосида “Жиззах Петролеум” 16 ширкат қаторида сотувга қўйилиши эълон қилинди.
Ўзбекистон Корхона ва ташкилотларнинг ягона давлат реестри ҳужжатларига қаралса ҳозирда “Жиззах Петролеум” ширкатининг 68 фоизлик акцияси Қибрисда рўйхатдан ўтган офшор BELVOR HOLDINGS LIMITEDга, 30 фоизи “Ўзбекнефтгаз” АЖга, 2 фоизи эса Gas Project Development Central Asia ширкатига тегишли эканини кўриш мумкин.
Баъзи манбаларда BELVOR HOLDINGS LIMITED ортида Марказий Осиё ва Россияда фаолият юритадиган бир қатор компаниялар, Eriell ва Enter Engineering компанияларининг таъсисчиси ва асосий ҳиссадори Бахтиëр Фозилов туриши айтилади.
Андижон, Қарши, Муборак шаҳарларида ҳам корхоналарига эга “Жиззах Петролеум” сайтида келтирилган маълумотларга кўра, ширкат ўтган йили 498, 7 минг тонна нефт ва 497, 4 миллион м3 табиий газ ишлаб чиқарган.
“Ўзбекнефтгаз” матбуот котиби Сиёвуш Ҳошимовга кўра, бошқа қўлга ўтиб кетган кўплаб ширкатларда ойликлар билан боғлиқ муаммолар кузатиляпти.
“Сўнгги пайтлар жуда кўп биздан чиқиб кетган ташкилот ишчилари “Ўзбекнефтгаз”га қайтаринглар деб тўполон қилишяпти. Cабаби олдин уларнинг ойликлари ўз вақтида берилган", - дейди Ҳошимов.