Озодлик ушбу видеода акс этган ҳодиса юзасидан изоҳ сўраб, Халқ таълими вазирлиги Бухоро вилоят бошқармасига мурожаат қилди.
Бошқарманинг ўзини таништиришни истамаган ходими дарсда ўқувчиларни калтаклаган шофирконлик ўқитувчи жазоланганлигини билдирди:
“Сиз айтаëган видео жорий йилнинг январь ойида мактаб ўқитувчиси томонидан тасвирга туширилган. Жисмоний тарбия ўқитувчиси чиндан ҳам шу куни 8-синфда дарс ўтиш пайтида шовқин солган ўқувчиларга нисбатан қўпол муносабатда бўлиб, уларни калтаклагани аниқланди. Бухоро вилояти халқ таълими бошқармаси томонидан мазкур видео назоратга олинди. Мавжуд ҳолатга аниқлик киритиш мақсадида ишчи гуруҳ ўрганишлар олиб борди”.
Мулозимга кўра¸ видеода Шофиркон туманидаги 45-умумий ўрта таълим мактаби жисмоний тарбия фани ўқитувчисининг дарс жараёнида ўқувчилар билан қўпол муносабатда бўлгани акс этган:
“Бу ҳолатни бошқарма мутахассиси Бобир Абдиев бошчилигидаги ишчи гуруҳ жиддий ўрганиб чиқди. Буни шундай қолдира олмаймиз-ку. Дарс жараёнини ташкил этишда педагогик этика талабларига риоя қилмаганлиги учун жисмоний тарбия фани ўқитувчисига нисбатан тегишли тартибда интизомий жазо чораси қўлланди".
Видеони йўллаган бухоролик йигитнинг айтишича¸ дарс пайтида ўқувчиларни мунтазам калтаклайдиган ўқитувчи (исми ошкор қилинмаяпти - таҳр.) ўқувчилар орасида “Гестапо” деб ном чиқарган.
Икки дақиқадан сал кўп давом этадиган видеода жисмний тарбия ўқитувчиси икки боланинг юзига мушт туширади ва бир қизни тепади. Видеонинг овози паст ëзилган бўлса ҳам бу калтаклашлар баробарида ўқитувчининг ўқувчиларни ҳақоратлагани эшитилади.
Ўзбекистон мактаб ва коллеж талабалари ҳамда болалар боғчалари тарбияланувчиларнинг ўқитувчи-муаллимлар томонидан калтакланиши ноодатий ҳодиса эмас.
Аввалроқ Тошкент шаҳрининг Шайхонтоҳур туманидаги 141-мактабнинг 9-синфида ўқитувчи ўз ўқувчиларини ураётгани акс этган видеони эълон қилинганидан сўнг ўқитувчи ишдан ҳайдалган эди.
Тошкентлик педагогнинг айтишича, ўзбек жамияти зеҳниятида “уриб ўқитадиган ўқитувчилар қораланмайди, қаттиққўллик, қайтага талабчанлик белгиси сифатида кўрилади.