Ссылки доступа

АҚШ генералы: америкалық сарбаздар Ауғанстаннан шығарыла бастады


Генерал Скотт Миллер

Ауғанстандағы халықаралық күштердің қолбасшысы, АҚШ әскерінің генералы Скотт Миллердің мәлімдеуінше, Құрама Штаттар мен оның одақтастарының күштерін Ауғанстаннан шығару басталды. Бұл туралы "Америка даусы" хабарлады.

Миллердің мәлімдеуінше, ол АҚШ президенті Джо Байденнің шешімі негізінде қабылданған жарлыққа сай әрекет етіп жатыр. Байден Америка тарихындағы ең ұзақ соғысты аяқтағысы келетінін айтқан.

Ауғанстандағы халықаралық күштерге 2018 жылдан бері қолбасшылық ететін генералдың айтынша, ол "Талибан" радикалды қозғалысының өкілдерімен сөйлесіп, елде әскери жанжал шығаруға болмайтынын ескерткен. Тәліптер халықаралық күштермен жасалған келісім шарттарын орындап жүр, бірақ Ауғанстанның үкімет әскеріне шабуыл жасауын доғарған жоқ. Бұның алдында қозғалыс өкілдері шетел әскері елден шығарылғаннан кейін ғана бейбітшілік туралы келіссөзді жалғастыратынын мәлімдеген.

АҚШ пен "Талибан" арасындағы келісімге сәйкес, шетел күштері 1 мамырға дейін Ауғанстаннан кетуі тиіс. Алайда президент Байден әскерді шығару мерзімін ұзартты. Жоспар бойынша, соңғы америкалық сарбаз Ауғанстаннан 11 қыркүйекте шығады.

НАТО елдерінің күштері де Ауғанстаннан бірнеше айдың көлемінде кетеді.

XS
SM
MD
LG