«Мустақилликнинг дастлабки 15 йилини бошқарган биринчи президент сифатида мен бир нарсадан пушаймонман. Агар сайловлар 2005 йилда бўлиб ўтган бўлса ва мен ҳокимиятни ўзим топширган бўлсам, у ҳолда афсусланмас эдим. Хатоларим бор эди. Аммо менимча, шу билан бирга Мен Қирғизистон учун жуда кўп яхшиликлар қилдим, сиёсий авантюристлар эркин сайловларда ғалаба қозона олмасликларини билар эдилар, шунинг учун менинг муддатим тугашидан олти ой олдин тўнтариш уюштиришди ва ҳокимиятни зўрлик билан эгаллаб олишди ва бунинг салбий оқибатлари шу кунгача давом этмоқда», — деди Қирғизистоннинг собиқ президенти Асқар Акаев YouTubeдаги «Автор ТВ» каналига берган интервьюсида.
2005 йил 24 мартда Қирғизистонда тарихга «лола инқилоби» номи билан кирган халқ қўзғолони бўлиб ўтди. Фуқароларнинг норозилигини ифодалашга парламент сайловлари натижалари сабаб бўлди. 4 мартдан бошлаб республикада маҳаллий ҳокимият оппозиция қўлига ўтди. 24 март куни Бишкекда бир нечта сиёсий кучларнинг катта митинги бўлиб ўтди, натижада мамлакатнинг ўша пайтгача 15 йил давомида ҳукмронлик қилган биринчи президенти Асқар Акаев ағдарилди. У оиласи билан Москвага қочиб кетган.
YouTub каналига берган интервьюсида Акаев, шунингдек, Қирғизистонда ҳокимиятни куч билан алмаштириш табиий ҳолга айланганини қўшимча қилди ва октябрь воқеалари буни яна бир бор тасдиқлади, деган фикрни билдирди. Ўтган йилнинг октябрь ойида Қирғизистонда парламент сайловларида овоз беришнинг дастлабки натижалари эълон қилингандан сўнг дарҳол оммавий норозилик намойишлари бўлиб ўтди. Мухолифат партиялари раҳбарлари ва тарафдорлари маъмурий биноларни эгаллаб олишди ва бир қатор сиёсатчиларни қамоқдан озод қилишди.