Ссылки доступа

Байден Путин билан Европага сафари давомида июнь ойида учрашишни режалаштирмоқда


АҚШ Президенти Жо Байден июнь ойида Европага сафари чоғида таклиф қилган Россия - Америка саммитини ўтказишга тайёрлигини эълон қилди.

«Умид қиламан ва ишонаман. Биз бунинг устида ишлаяпмиз», деди Президент Байден сешанба куни журналистларнинг саволларига жавобан. Жо Байден президент сифатида Буюк Британияга биринчи чет эл сафарига чиқади ва у ерда 11-13 июнь кунлари Г7 саммитида иштирок этади. 14 июнь куни у Брюсселга НАТО саммитига боради ва кейин Европа Иттифоқига аъзо давлатларнинг раҳбарлари билан учрашади.

Президент Байден апрель ойида АҚШ-Россия саммитини ўтказиш ғоясини илгари сурди ва бу америкалик кузатувчилар учун кутилмаган бўлди. Жо Байден Россия президенти Владимир Путин билан учинчи мамлакатда учрашишга ва икки мамлакат ўртасидаги тобора кучайиб бораётган зиддиятларни келтириб чиқарадиган муаммоларни муҳокама қилишга тайёрлигини маълум қилди. Ушбу муаммолар қаторига Россиянинг Украинага қарши таҳдиди, Россиянинг Америка компьютер тармоқларига қарши киберҳужумлари ва Россияда Алексей Навалний ва унинг тарафдорларини таъқиб қилиш киради.

Президент Путиннинг маслаҳатчиси Юрий Ушаковнинг сўзларига кўра, икки президент учрашувига тайёргарлик қизғин паллада. Июнь ойидаги учрашувнинг аниқ саналари муҳокама қилинмоқда.

XS
SM
MD
LG