Қирғизистон Ташқи ишлар вазирлиги матбуот хизматининг хабар беришича, томонлар ўз музокараларида Қирғизистондан Хитойга қишлоқ хўжалиги маҳсулотларини экспорт қилишни кенгайтириш, Торугарт ва Иркештам назорат-ўтказиш пунктлари фаолиятини оптималлаштириш, товар айирбошлаш ҳажмини ошириш масалаларига эътибор қаратдилар. Шунингдек, товар айирбошлаш, грант лойиҳаларини амалга ошириш, Хитой — Қирғизистон темир йўлини қуриш, Қирғизистон Республикасининг ХХР олдидаги давлат қарзини тўлаш, Қирғизистон иқтисодиётига мақсадли инвестицияларни жалб қилиш, қўшма инфратузилма лойиҳаларини илгари суриш масалалари ҳам кўриб чиқилди.
Вазир Ван И Қирғизистонга 150 минг дозада коронавирусга қарши эмлашнинг иккинчи партиясини етказиб бериш, 350 миллион юань (тахминан 54 миллион доллар) миқдорида иқтисодиётни қўллаб-қувватлаш учун грант ажратиш тўғрисида Хитой томонининг қарори ҳақида маълум қилди.
Музокаралар натижасида Қирғизистон Республикаси Ташқи ишлар вазирлиги ва ХХР Ташқи ишлар вазирлиги ўртасида 2022-2023 йилларда ҳамкорлик дастури имзоланди.