Олмаотадаги суд уларнинг олтитасини жаримага тортди ва намойишчилардан бирига огоҳлантириш берди. Бу ҳақда уларнинг адвокати Шинкуат Байжанов маълум қилди.
Гулнар Косдаулет, Гулбаран Омирали, Гулпия Казйбек, Нурзат Эрмекбай, Жамиля Макенга 30 ойлик ҳисоб-китоб кўрсаткичлари (қарийб 87 минг танга) миқдорида жарима солинди, суд 30 фоизли чегирмани ҳисобга олган ҳолда ҳар бирига 61 550 танга тўлатишга қарор қилди. Акикат Калиолла 41 минг танга жаримага тортилди. Маъмурий суд 67 ёшли Калида Оқитканга огоҳлантириш берди. Уларнинг барчаси «тинч йиғилишни ўтказиш тартибини бузиш»да айбланган.
Полиция томонидан ҳибсга олинган Байболат Кунболатули айбсиз деб топилди, тергов органлари материалларида у «митингда қатнашмаган, фақат видеотаъсвирга олган» дейилган.
«Биз айбловни тан олмаслигимизни ва жарималарни тўламаслигимизни айтдик», — дейди Гулнар Косдаулет суҳбатда.
Олмаотадаги Хитой консуллиги олдида бир неча намойишчилар 18 май куни юзинчи пикетга борганларидан кейин ҳибсга олинган. Шинжондаги қариндошлари ва дўстларини озод қилишни талаб қилганларга дипломатик ваколатхонага полиция рухсат бермади. Улар консуллик биносидан узоқликда норозилик билдиришди. Қозоғистон полицияси уларни митинг бошлангандан бир соат ўтгач, одамлар тарқалиб кетмоқчи бўлган пайтда ҳибсга олишди.
100 кунлик норозилик давомида ҳеч ким Хитой консуллигидан пикетчилар олдига чиқмади. Намойишчиларнинг таъкидлашича, Хитой уларнинг талабларини эътиборсиз қолдирмоқда, Қозоғистон расмийлари эса чегара билан ажратилган оилаларнинг фожиасига бефарқ.
Қозоғистон расмийлари Хитойнинг мамлакат иқтисодий жиҳатдан боғлиқ бўлган сиёсатини очиқчасига танқид қилишдан тийилиб, Шинжонда сақланаётган одамларнинг қариндошларини шикоятлари «дипломатик каналлар орқали» кўриб чиқилишини айтмоқдалар.
Кўпгина гувоҳлик ва ҳужжатларга, инсон ҳуқуқларини ҳимоя қилувчи ташкилотларнинг баёнотларига кўра, Хитой сўнгги бир неча йил давомида Шинжонда маҳаллий этник гуруҳларга, шу жумладан қозоқларга қарши репрессияларни амалга оширмоқда. Ҳужжатлар билан уларнинг ҳуқуқларини бузилиши ўзбошимчалик билан ҳибсга олиш, мажбурий стерилизация ва мажбурий меҳнатни ўз ичига олади.
Қозоғистоннинг тинч йиғилишлар тўғрисидаги қонунига кўра ҳар қандай ҳаракатлар, ҳаттоки битта пикет ҳам маҳаллий ҳокимият билан келишилган бўлиши керак. Ҳуқуқ фаоллари ўтган йили қабул қилинган митинглар тўғрисидаги қонунни расмийлар илғор, халқаро меъёрларга зид ва ҳуқуқларни чеклаш деб ҳисоблайди.