Ссылки доступа

Президент Макрон Франция Руандадаги геноциднинг олдини олмагани учун узр сўради


Франция президенти Эммануэль Макрон Париж 1994 йилда Африкадаги Руанда давлатида тутси халқининг геноцид қилинишининг олдини олиш ва тўхтатишга ҳаркат қилмагани учун узр сўради. Руандада 1994 йилги қирғинда тутси халқига мансуб 800 минг киши ўлдирилган эди.

Руанда пойтахти Кигалида геноциднинг 250 минг қурбони дафн этилган мемориал комплексда нутқ сўзлаган Макрон 1994 йил фожиасини бошидан ўтказганларнинг кечиримидан умид қилаётганини айтди.

Макрон мазкур геноциднинг олдини олмагани учун масъулият Франциянинг зиммасида эканини тан олди ва айни пайтда Франция ҳеч қачон бу қирғинни қўллаб-қувватламаганини таъкидлади.

Бундан аввал Руанда президенти Поль Кагаме Францияни геноцидни қўллаб-қувватлаганликда айблаган эди. Кагаме Франция президентининг Руандага ташрифи ва унинг узр сўраши ўта аҳамиятли эканини айтди.

Кагаме “руандаликлар Франциянинг ўша пайтдаги ҳатти-ҳаракатларини ҳеч қачон унутмайди, аммо кечириши эҳтимол”, деб таъкидлади.

Парижда яқинда ўтказилган тадқиқот натижаларига қараганда, ўша пайтда президент Франсуа Миттеран раҳбарлиги остида бўлган Франция ҳукумати 1994 йилнинг баҳорида тутси халқини геноцид қилган Руанда ҳукумати билан тиғиз ҳамкорлик қилган.

Макроннинг айтишича: “Париж регионал конфликтни ва фуқаролар уришининг олдини олишга ҳаракат қилган, аммо амалда оммавий қирғинни уюштирган Руанда ҳукумати тарафида бўлган”.

Қирғин бошланганидан сўнг Кагаме раҳбарлигидаги исёнчилар Руандада ҳокимиятни эгаллаб олган. Кагаме ҳокимиятга келгач Руандада хуту халқининг тутси халқига нисбатан геноцидини тўхтатишга ва ислоҳотлар ўтказишга муваффақ бўлган. Ўшандан бери Кагаме Руандани бошқариб келмоқда.

XS
SM
MD
LG