Суҳбат чоғида Байден Зеленскийга шу ёз уни Оқ уйда кўришдан мамнун бўлишини билдирган. АҚШ президенти Украина суверенитетини дастаклаш бўйича қатъий позициясини яна бир бор тасдиқлаган.
Reuters агентлигининг Украина президенти маслаҳатчиси сўзларига таянган ҳолда хабар қилишича, мулоқот чоғида Байден ва Зеленский АҚШ ва Россия президентларининг 16 июнь куни Женевада бўлиб ўтажак учрашуви арафасида ўз позицияларини мувофиқлаштириб олганлар.
Аввалроқ Зеленский АҚШ президенти Жо Байден билан Женевадаги Россия-АҚШ саммитигача учрашишни истаётганини билдирганди. Axios янгиликлар порталига берган интервьюсида Украина президенти АҚШ маъмуриятининг “Шимолий оқим – 2” газ қувури бўйича санкциялар жорий қилмасликка оид қароридан ҳафсаласи пир бўлганини қайд этган. Зеленский АҚШ президентини мазкур қурилишни тўхтатиш зарурлигига ишонтириш учун Байден билан исталган пайтда ва исталган жойда учрашишга тайёрлигини урғулаган.