Ссылки доступа

Дар Узбекистон ширкатдорони анҷумани ҳизби "Эрк"-ро ба бозпурсӣ даъват карданд


Ширкатдорони анҷумани ҳизби сиёсии "Эрк" ё "Ирода"-ро дар Узбекистон ба бозпурсӣ даъват карданд. Анҷумани ҳизб дар манзили овозхон Ҷаҳонгир Отаҷонов дар шаҳри Тошканд сурат гирифт.

Ширкатдорони анҷуман рӯзи 15 июн бозпурсӣ шуданд.

Абдусалом Эргашев, яке аз фаъолони ҳизби "Эрк" гуфт, ӯро дар доираи парвандаи ҷанҷол дар манзили Отаҷонов ба бозпурсӣ даъват, аммо асосан дар бораи фаъолияти ҳизб бозпурсӣ кардаанд.

Рӯзи 26 майи соли ҷорӣ дар манзили Отаҷонов дар шаҳри Тошканд анҷумани ҳизби "Эрк" баргузор ва Ҷаҳонгир Отаҷонов ба ҳайси номзад дар интихоботи президентии Узбекистон пешбарӣ шуд.

Отаҷонов низ рӯзи 13 июн дар шабакаҳои иҷтимоӣ хабар дод, ки ӯро низ ба бозпурсӣ даъват ва 4 соат бозпурсӣ кардаанд.

Отаҷонов ҳамчунин навишт, ки ӯро таъқиб ва телефонашро гӯш мекунанд. Овозхони ҳамакнун пешин мегӯяд, амволашро ба ҳабс гирифтаанд. Вай ҳамаи ин таъқибҳоро ба эъломи ширкат дар интихоботи президентӣ рабт медиҳад.

Рӯзе ки дар манзили Отаҷонов анҷуман баргузор мешуд, гуруҳе аз занону мардон вориди манзили вай шуда, ҷанҷол роҳандозӣ карданд.

Интихоботи президентӣ дар Узбекистон рӯзи 24 октябр дар назар аст. Бино ба қонунгузории он кишвар, танҳо ҳизбҳои сиёсӣ ҳаққи пешбарии номзадро доранд.

XS
SM
MD
LG