29 июнь куни Нур-Султон шаҳрининг ихтисослаштирилган туманлараро маъмурий суди фуқаролик фаоллари Нурлан Олтинбоев ва Айдар Сиздиковни тинч йиғилишларни ташкил этиш ва ўтказиш тартибини бузганликда айбланиб ҳибсга олиш тўғрисида қарор чиқарди.
Олтинбоев 14 июнь куни АҚШ элчихонаси олдида бўлиб ўтган норозилик акциясида қатнашгани учун судланган. Суд қарори билан у 10 кунга изоляторга юборилди. Суд қарорида айтилишича, у «маъмурий жазо қўлланилгандан кейин бир йил ичида такроран содир этилган тинч йиғилишларни ташкил этиш тартибини бузганликда» айбдор деб топилган. Олтинбоев судда унга қўйилган айбловни рад этди ва у ҳеч қандай учрашувлар ташкил қилмаганлигини, фақат ҳаракат қилиш эркинлиги конституциявий ҳуқуқидан фойдаланганлигини айтди.
36 ёшли Айдар Сиздиқов «оммавий тадбирларни ташкил этиш ва (ёки) ўтказиш тартибини бузганлик» учун судланган. Суд қарорида айтилишича, 11 июнь куни Сиздиков ўзининг Фейсбукдаги саҳифасида «12-13 июнь кунлари Олмаота, Нур-Султон ва Чимкентда бўлиб ўтадиган митингларда иштирок этишга чақирган» репост қилган. «Гарчи у [Сиздиков] ўз айбини тан олмаган ва 2021 йил 3 июндан бери ўзининг Фейсбукдаги саҳифасидан фойдаланмаётганлигини таъкидлаган бўлсада, унинг Инстаграм ижтимоий тармоғида рўйхатдан ўтган саҳифаси бор. Сиздиковнинг ҳаракатлари ноқонуний эди, чунки ҳеч қандай митинг ўтказиш учун аризалар киритилмаган», дейилади қарорда.
58 ёшли Нурлан Олтинбоев (Нурлибай Олтинбоев — ҳужжатларга кўра) ўтган йилнинг сентябрь ойида «тинч йиғилишларни ўтказиш тартибини бузгани учун» беш кунга ҳибсга олинган. Январь ойида у «рўйхатдан ўтмаган бирлашма фаолиятида қатнашгани учун» 103 минг танга жаримага тортилди.
Шу ой бошида Қозоғистон пойтахти суди фуқаролик фаоли Айдар Сиздиковни суд томонидан экстремистик деб топилган тақиқланган бирлашма фаолиятини «ташкил этиш» ва унинг фаолиятида «иштирок этиш» айблови билан уч йиллик озодликни чеклаш жазосига ҳукм қилди. Бундан ташқари, Сиздиковга беш йилга ижтимоий ва сиёсий фаолият билан шуғулланиш, митингларда, йиғилишларда қатнашиш ва ижтимоий тармоқларда хабар юбориш тақиқланди.
28 июнь куни фаоллар Қайиргелди Нургалиев ва Марат Мусабоевлар 15 ва 20 кунга ҳибсга олинган. 29 июнь куни пойтахт суди фаол Айхан Абеновани 15 суткага ҳибсга олди. Улар суд томонидан 488-модданинг 6-қисми («тинч йиғилишлар ўтказиш тартибини бузган ҳолда ўтказиладиган оммавий тадбирда иштирок этиш») бўйича айбдор деб топилди.
6 июлда нишонланадиган пойтахт куни, 2019 йилда президентлик лавозимидан кетганига қарамай, давлат аппарати таъсирини сақлаб қолган собиқ президент Нурсултон Назарбоевнинг туғилган кунига «тўғри келади».