Ссылки доступа

Юртига боришдан бош тортган Беларус спортчиси Токиодаги «хавфсиз жойга» олиб кетилди


Халқаро Олимпия қўмитаси (ХОҚ) ва Токиодаги Олимпия ўйинлари ташкилий қўмитаси вакиллари беларуслик спортчи Кристина Тимановская билан тўғридан-тўғри гаплашдилар. Бу ҳақда ХОҚ матбуот хизматига таяниб, «ТАСС» хабар берди.

Аввалроқ, Япониянинг Sports Hochi спорт нашри Тимановскаяни хавфсиз жойга олиб кетилаётгани ҳақида хабар берганди.

Токиода ХОҚ вакиллари ва Беларус спортчиси ўртасида Тимановскаянинг ўз ватанига қайтишни истамаслиги билан боғлиқ кейинги қадамлар бўйича музокаралар давом этмоқда.

ХОҚ 2 августга ўтар кечаси берган баёнотида қўмита аъзолари ва япон расмийлари Тимановская билан тўғридан-тўғри гаплашганини айтди. ХОҚ матбуот котиби Марк Адамснинг қўшимча қилишича, у тунни аэропорт меҳмонхонасида расмийлар ҳимоясида ўтказган.

ХОҚ беларуслик спортчини қўллаб-қувватлашини ва у билан эрталаб «гаплашишда давом этишини» айтди.

Бу орада, Белоруссия ҳукуматининг кўплаб рақибларини мамнуният билан кутиб олган қўшни Полша, олимпия спринтерига ёрдам беришни таклиф қилди. Ташқи ишлар вазири ўринбосари Маркин Пшидач ўз твиттерида Тимановскаяга «гуманитар виза таклиф қилинганини ва у хоҳласа, спорт фаолиятини Полшада давом эттириши» мумкинлигини ёзди.

Чехияда Ташқи ишлар вазири Якуб Кулханек твиттерда Беларус атрофидаги вазиятни «жанжалли» деб билишини ва Чехия «ёрдам беришга тайёр» эканлигини айтди.

«Биз унга халқаро ҳимояга мурожаат қилишимиз учун ҳудудга киришга виза таклиф қиляпмиз. Бизнинг Токиодаги элчихонамиз ҳам ёрдам беришга тайёр», — дея қўшимча қилди чех дипломат.

Бир неча соат ўтгач, Тимановская Японияда «хавфсиз» ва полиция ҳимоясида эканлигини айтди. Унинг хабари Телеграмда BSSF канали томонидан эълон қилинган.

BSSF вакили Александр Опеикиннинг APга айтишича, Тимановская Александр Лукашенко авторитар ҳукумати тарафдорлари томонидан нишонга олинган.

«Кампания жуда жиддий эди ва бу унинг Белоруссиядаги ҳаёти хавф остида қолишини аниқ кўрсатди», деди у. Опеикиннинг сўзларига кўра, Тимановская Австрия элчихонасидан бошпана сўрайди.

BSSF ўтган йилнинг август ойида беларуслик нафақахўр Александра Герасимения томонидан ташкил этилган, Лукашенканинг мунозарали қайта сайланишидан кейин Беларусда норозилик намойишлари бошланган.

Жамғарма намойишчиларга нисбатан полициянинг шафқатсиз тазйиқини тўхтатишга чақирганидан кейин, расмийлар томонидан таъқибга учраган беларуслик спортчиларга Фонд молиявий ва юридик ёрдам кўрсатди.

Январь ойида 350 га яқин беларуслик спортчилар ва спорт жамоасининг бошқа аъзолари президентлик сайловини бекор қилиш ва барча «сиёсий маҳбуслар» ва ундан кейинги оммавий намойишлар пайтида ҳибсга олинганларни озод қилиш тўғрисида очиқ хатга имзо чекишди.

Мухолифатдаги Беларус спорт бирдамлик жамғармаси вакилларининг айтишича, Тимановская Беларус спортчилари мураббийлар штабининг ҳаракатларини танқид қилгани учун Токиодан мажбуран олиб чиқилган.

2 август куни Тимановская 200 метрга стартда қатнашиши керак эди. Аммо, унинг сўзларига кўра, 1 август куни терма жамоа ходимлари унинг хонасига келишган ва уни мажбуран буюмлари билан аэропортга олиб кетишган. Аэропортда спортчи полицияга мурожаат қилган. Беларус Олимпия қўмитаси депортация ҳақидаги қарор спортчининг ҳиссий ва психологик ҳолати билан боғлиқ эканини айтди.

XS
SM
MD
LG