Сариев 30 қыркүйекке дейін Ұлттық қауіпсіздік мемлекеттік комитетінің тергеу изоляторында отырады. Сариевтің адвокаты Тимур Сұлтанов сот шешімімен келіспейтінін мәлімдеді.
Арнайы қызмет Темір Сариевті 3 тамызда ұстады.
"Тергеу анықтағандай, Сариев экономика министрі болып тұрған кезде "Құмтөр" кеніндегі жұмыстардың экологияға зардабын бірнеше миллиард сомқа төмен бағалаған", - деп хабарлады комитет.
Ұлттық қауіпсіздік мемлекеттік комитеті Құмтөр ісі бойынша бірнеше депутат пен шенеунікке айып таққан. 31 мамырда бұрынғы премьер-министр Омурбек Бабанов, Жогорку Кенеш депутаттары Асылбек Жээнбеков пен Торобай Зулпукаров, экс-депутат Исхак Пирматов пен Талантбек Узакбаев арнайы қызметтегі тергеуден соң ұсталды.
9 маусымда президент Алмазбек Атамбаевтың Жогорку Кенештегі бұрынғы уәкілетті өкілі Данияр Нарымбаев, экс-депутат Алмазбек Баатырбеков қамауға алынды. Үкіметтің парламенттегі бұрынғы өкілі Динара Молдошева күдікке ілікті, ол ешқайда кетпеу туралы қолхатпен босатылды. Сонымен бірге бұрынғы бірінші вице-премьер-министр Тайырбек Сарпашев ұсталды.
Экс-депутатта Алмазбек Баатырбеков пен Талантбек Узакбаев, Исхак Пирматов, сонымен бірге бұрынғы бірінші вице-премьер-министр Тайырбек Сарпашев тергеумен келісімге отырып, олар үйқамаққа ауыстырылды.
Арнайы қызмет бұрынғы президенттер Асқар Ақаев пен Құрманбек Бакиевке іздеу жарияланғанын хабарлады. Ақаев 2 тамызда Бішкекке келіп, арнайы қызметте тергеуде болды. Бұрынғы президент Алмазбек Атамбаевтың әрекеттеріне де заң бойынша баға берілетіні айтылды.