Ссылки доступа

Ходимлари коронавирусга қарши эмланган емакхоналар учун карантин чеклови бекор қилинади


Жорий йилнинг 10 августидан бошлаб ресторан, кафе, ошхона ва чойхоналарнинг ходимлари коронавирусга қарши вакцинанинг камида 2 та дозаси билан эмланганлиги тўғрисидаги сертификати бўлган тақдирда, уларга нисбатан карантин чекловлари татбиқ этилмайди.

Бу ҳақда Республика махсус комиссиясининг куни кеча ўтказилган галдаги йиғилишида қарор қабул қилинган.

Махсус комиссиянинг мазкур қарори “аҳолини оммавий эмлаш коронавируснинг янги тўлқинларининг олдини олишнинг муҳим омили эканлигини ҳисобга олиб, шунингдек, тадбиркорлик субъектларини пандемия шароитида ҳар томонлама қўллаб-қувватлаш ва эмлаш жараёнларини янада жадаллаштириш мақсадида” қабул қилингани айтилмоқда.

Қарорга мувофиқ, сешанбадан эътиборан умумий овқатланиш объектларига коронавирусга қарши вакцина билан эмланганлиги тўғрисидаги QR-коди ёки сертификати мавжуд бўлган ташриф буюрувчиларни киритиш тавсия этилган.

Аввалроқ Озодлик Республика махсус комиссияси жорий йилнинг 28 июнидан бошлаб мамлакатдаги барча кўнгилочар муассасалар – жамоатчилик ошхоналари, бар, кафе, ресторанлар, тунгги клублар, билярдхона ва компьютер марказлари эрталабки 8.00 дан кечки соат 20.00 гача ишлашини белгилаб қўйгани ҳақида хабар қилган. Мазкур чеклов юзасидан сўнгги пайтларда маҳаллий матбуот ва ижтимоий тармоқларда норозилик чиқишлари кузатилаётган эди.

Комиссиянинг кечаги қарори билан жорий йил 1 октябридан тадбиркорлик ва хизмат кўрсатиш субъектларининг ишчи ва ходимлари ҳамда якка тартибдаги тадбиркорлар коронавирусга қарши вакцинанинг камида 2 та дозаси билан эмланганлиги тўғрисидаги сертификати бўлмаган тақдирда, уларнинг фаолият кўрсатиши вақтинчалик тўхтатилиши белгиланган.

XS
SM
MD
LG