Аввалроқ Санитария-эпидемиологик осойишталик ва жамоат саломатлиги хизмати кўрсатмаси билан жорий йил 9 августидан бир ҳафта давомида аҳолини Хитойдан келтирилган вакцинанинг иккинчи ва учинчи дозаси билан эмлаш ишлари тўхтатилгани ҳақида хабар қилинган эди.
Бу маълумот ижтимоий тармоқларда “вакцинанинг аҳоли билмайдиган қандайдир ножоиз таъсири чиққани” тўғрисидаги тахминлар ёки “вакцина етишмас экан” деган гап-сўзлар тарқалиши учун замин яратган, пировардида Инновацион ривожланиш вазирлиги бу тахмин ва мишмишларнинг асоссизлиги ҳақида баёнот тарқатишга мажбур бўлган эди.
Ўзбек-хитой вакцинасининг иккинчи ва учинчи дозаси билан эмловни тўхтатишга оид қарор жорий қилинганидан икки кун ўтар-ўтмас бекор қилиниши расмийларнинг аҳоли орасида мазкур вакцина тўғрисида турли мулоҳазаларнинг янада урчишига барҳам бериш ҳаракати ўлароқ баҳоланиши мумкин.
Ўзбекистонда аҳолини коронавирусга қарши эмлаш тадбирлари 1 апрелдан бошланган. Шу кунда ўзбекистонликлар Хитойдан келтирилган ZF-UZ-VAC 2001 вакцинасидан ташқари Британиянинг AstraZeneca, Россиянинг “Спутник V” ҳамда АҚШнинг Moderna вакцинаси билан эмланмоқда.
Жорий йилнинг 11 августидан эътиборан Ўзбекистонда аҳолини ZF-UZ-VAC2001 вакцинасининг иккинчи ва учинчи дозалари билан эмлаш яна қайта йўлга қўйилган. Бу ҳақда Соғлиқни сақлаш вазирлиги матбуот хизмати маълумот тарқатди.