Аввалроқ, президент Байден америкалик қўшинлар 31 августга қадар Афғонистондан бутунлай олиб чиқилишини ва бу мамлакатдан потенциал ўн минглаб одамларни эвакуация қилиш бўйича операция шу санага қадар якунланиши кераклигини маълум қилганди. Бироқ, якшанба куни Жо Баден, бу «қийин ва оғриқли жараён» муаммоларга тўла эканлигини тан олди. АҚШ қўшинлари Афғонистонда 31 августдан кейин ҳам қолиши мумкин, деди президент Байден.
Душанба куни Толибон расмийлари америкалик аскарларни олиб чиқиш муддатини кечиктириш салбий оқибатларга олиб келиши ҳақида огоҳлантирди. Шу билан бирга, Британия Оқ уйни эвакуация операцияси тугагунга қадар қўшинларни олиб чиқишни кечиктиришга чақирди. Бу операцияга Британия, Франция ва Германия қўшинлари жалб қилинган. Ҳозирда 6 минг кишини ташкил этувчи Америка контингенти чиқиб кетган тақдирда улар буни давом эттира олмайди. Сешанба куни G7 мамлакатлари раҳбарлари ушбу масалани муҳокама қилиш учун виртуал йиғилиш ўтказадилар.
Душанба куни кечаси, Конгресс аъзоси, Вакиллар палатасининг разведка қўмитаси раҳбари Адам Шифф, Афғонистонда қолган америкаликлар сонини ҳисобга олган ҳолда, саккиз кун ичида эвакуацияни «эҳтимолдан йироқ» деб атади.