Ссылки доступа

Олмаотада журналистни бинодан итариб чиқарган ҳокимият қўриқчиси ишдан четлатилди (видео)


Олмаотанинг Алатау тумани ҳокимлиги қўриқчиси «Хабар 24» телеканали журналисти Акбопе Танирбергенни бинодан итариб чиқариб юборгани учун ишдан бўшатилди, деб хабар беради “Информбюро”.

Аввалроқ, Танирберген қўриқчи уни қўлида қандай кўтариб, ҳокимиятдан итариб юбораётгани тасвирланган видео лавҳани намойиш қилди. Акбопенинг сўзларига кўра, шундан кейин унинг бутун танаси кўкарган.

«Ҳокимият қўриқчилари шундай ишлайди», — деди воқеадан ҳайратга тушган мухбир камерага.

Журналистларнинг ҳуқуқларини ҳимоя қиладиган «Адил сўз» ташкилоти таъкидлаганидек, Танирбергеннинг бақирганига қарамай, ҳокимият ходимларининг ҳеч бири воқеага аралашмаган.

Туман ҳокими Азамат Калдибековга кўра, қоровул ҳокимият ходими эмас — у хусусий ширкат ходими. Калдибеков, шунингдек, у ва унинг ўринбосарлари журналистларнинг бинога киришига йўл қўймаслик учун кўрсатма бермаганини айтди. Шунингдек, ҳокимият Танирберген ва унинг оператори ўз мақомларини махсус илова орқали сканер қилмаганини ва турникет остидан ўтмоқчи бўлишганини айтди.

«Мен тушунганимдек, журналист қоидани менсимади ва турникет остидан ўтди. Қўриқчи эса чора кўрди. Мен бинога кирган соқчилар ёки давлат хизматчиларининг ҳаракатларини оқламайман. Мен узр сўрамайман. Қўриқчи тергов муддатига тўхтатилган. У аллақачон ўз тушунтиришларини берган», — деди Калдибеков.

«Қўриқчи мени нафақат кўтариб чиқди, балки икки марта итариб юборди. Мен ҳамамсини жуда яхши эслайман ва кўз ёшларимни ушлаб тура олмаяпман. Мен шунчаки кулгили кўринишни хоҳламадим, лекин улар менга худди буюмдек муносабатда бўлишди — деди Танирберген.

«Хабар 24» телеканали директори Алена Горбачеванинг тасдиқлашича, ҳеч ким журналистлардан ўз статусларини сканерлашни сўрамаган ва ҳокимият қўриқчилари журналистларни бинога ҳар қандай йўл билан киргизишни хоҳламаган. Горбачева телеканал номидан полицияга ариза ёзмоқчи.

Ахборот ва ижтимоий ривожланиш вазири Аида Балаеванинг айтишича, қоровулнинг ҳаракатлари ноқонуний ва ОАВ вакилларининг ҳуқуқларига зиддир. Шундан сўнг, ҳокимият хизмат текширувини бошлади.

XS
SM
MD
LG