Ссылки доступа

Ташқи ишлар вазирлиги Ўзбекистон афғон қочқинларни қабул қилмаслигини расман билдирди


“Ташқи ишлар вазирлиги Ўзбекистон Республикаси ўз ҳудудида афғон қочоқларини қабул қилмаслигини, транзитда ёрдам кўрсатишини, уларнинг мамлакатда қатъий чекланган вақтда бўлиб туришини яна бир бор маълум қилади”- деб билдирди 30 август куни Ўзбекистон ТИВ.

Билдирилишича, вазирликнинг бундай баёнот тарқатишига 30 август куни интернет тармоғидаги айрим ахборот агентликлари ва веб-сайтлари орқали “Ўзбекистон Афғонистондаги Толибон режимидан қочганларга ўз чегараларини очишга тайёрлиги” ҳақидаги маълумотлар тарқалгани сабаб бўлган.

“Ҳозирда хавфсизликни таъминлаш мақсадида Ўзбекистон-Афғонистон чегараси тўлиқ ёпилган ва “Термиз” назорат-ўтказиш пунктидан қуруқлик орқали ўтиш амалга оширилмаяпти. Яқин орада Ўзбекистон-Афғонистон чегарасидаги “Термиз” назорат-ўтказиш пунктини очиш кўзда тутилмаган”,-деб огоҳлантирган вазирлик.

Аввалроқ Озодлик радиоси Reuters агентлигига таянган ҳолда Германия ташқи ишлар вазири Хайко Маас “Ўзбекистон Германия рўйхатидаги Толибондан қочаётган ва эвакуацияга муҳтож афғонларга чегарасини очишга тайёр”, - деб баёнот бергани ҳақида хабар қилганди.

30 август куни Хайко Маас Тошкентда ҳамкасби Абдулазиз Комилов билан учрашган.

XS
SM
MD
LG