Вазирлар маҳкамасининг 30 августдаги йиғилишида Бердимуҳамедов Бердимаммед Аннамамедовни Аваза тумани бошлиғи ва Аваза миллий сайёҳлик зонаси раиси лавозимидан озод қилди. Бунинг ўрнига, президент Бузмеинск тумани бошлиғининг собиқ ўринбосари Давлат Жумаевни тайинлади.
Туркманистон давлат ахборот агентлиги ўз хабарида ходимларни алмаштириш сабабларини келтирмаган. Аммо «Озодлик» радиосининг туркман хизмати бу 27-28 август кунлари Авазада дам олувчилар «ҳеч қандай тушунтиришсиз миллий сайёҳлик зонасидан чиқариб юборилганидан» кейин содир бўлганини қайд этади.
«Уларни нафақат сабабсиз ҳайдаб юборишди, балки фуқароларни бошқа вилоятлардан уйларига олиб боришда ҳам ёрдам кўрсатилмади. Бундан ташқари, меҳмонхоналар учун тўлаган пуллари уларга қайтарилмади», — деди газетага манбалардан бири.
Унинг сўзларига кўра, чиқариб юборилишининг сабаби тўртта сайёҳда «дельта» штаммининг аниқланиши бўлган.
Кутилмаганда меҳмонхоналардан қувилган дам олувчиларнинг аниқ сони номаълум. Манбанинг таъкидлашича, кўпчилик сайёҳлар дарҳол ўз ҳудудларига кета олишмаган, чунки ҳозирда оддий ҳаво ва темир йўл алоқалари йўқ.
Журналистлар миллий сайёҳлик зонаси бош бошқармаси Аваза маъмурияти, шунингдек, Соғлиқни сақлаш ва тиббиёт саноати вазирлиги ҳамда Туркманистон давлат санитария-эпидемиология хизматидан изоҳ ололмади.
Туркманистон хроникаси, шунингдек, Авазада дам олаётган фуқаролар курорт меҳмонхоналаридан чиқариб юборилгани ҳақида хабар берди.
«27-куни меҳмонхона ишчилари ва полиция одамлардан кечки соат 6гача хоналарини бўшатишни сўрашди. Шу кундан бошлаб меҳмонхона ишчилари Авазага киришни тўхтатдилар», — деб ёзади газета.
«Озодлик» радиосининг туркман хизмати август ойи давомида маҳаллий сайёҳлар учун Аваза иккинчи марта ёпилганига эътиборни қаратади. Ой бошида бу эрда Бердимуҳаммедов ва Марказий Осиё давлатларининг бошқа президентлари иштирокида саммит ўтказилаётгани сабабли курорт ёпилган эди.