Россия Федерацияси Ички ишлар вазирлиги расмий сайтида эълон қилинган ҳужжатга кўра, картада чет эл фуқаросининг шахсий маълумотлари, исм, фамилия ва бошқа маълумотлар бўлиши мумкин. Электрон ташувчида чет эл фуқароси бармоқ изини рўйхатдан ўтказганлиги ҳақидаги маълумотларни сақлаш кўзда тутилган.
Шу билан бирга, «техник жиҳатдан мумкин бўлса» чипли карталар ҳам чиқарилади. Бошқа ҳолларда, Россия Федерациясига тўқсон кундан ортиқ вақт давомида келган ёки меҳнат фаолиятини амалга ошириш учун келган чет элликлар ва фуқаролиги бўлмаган шахслар мажбурий давлат бармоқ изларини рўйхатдан ўтказиш ҳамда суратга олиш тартибидан ўтганлигини тасдиқловчи ҳужжатга эга бўлиши керак.
Тахмин қилинишича, Россия Ички ишлар вазирлигининг буйруғи 2021 йил 29 декабрда кучга киради. Айни пайтда, бўлим маълумотларига кўра, ушбу лойиҳанинг жамоатчилик муҳокамаси ва коррупцияга қарши мустақил экспертиза ўтказилмоқда.
Россия матбуотининг ёзишича, мамлакатда узоқ вақт қолиш учун бундай ягона электрон ҳужжат чет элликларга 10 йилга берилади, кейин уни алмаштириш керак бўлади. Бундан ташқари, Россия Федерациясида муҳожирларни мажбурий электрон рўйхатга олишни жорий этиш таклиф қилинди ва иш берувчилар ҳам, чет элликлар ҳам махсус реестрда рўйхатга олиниши керак бўлади.
Россияда меҳнат муҳожирларига бармоқ изи чипи ва фотосурати бўлган карта бериш таклиф қилинмоқда
Россияда мамлакатга уч ойдан кўпроқ вақтга келган меҳнат муҳожирлари ва чет элликларга чип ҳамда фотосурати бўлган пластик карта бериш таклиф қилинмоқда.