Гуруҳ сайтида қайд этилишича, россиялик мухолифатчи, коррупцияга қарши кураш фаоли йирик ижтимоий акцияларни ташкил қилгани, ислоҳотлар учун ҳамда президент Владимир Путин ва унинг ҳукуматига қарши сиёсий курашларда иштирок этгани учун халқаро майдонда шуҳрат қозонган. Мақолада Алексей Навальний “Путин юрагига қўрқув солган инсон”, дея таърифланган.
“Европанинг янгиланиши” гуруҳи аъзоси Ги Верхофстадтга кўра, Навальний Европа кенгаши маъқуллаётган барча қадриятлар – демократия ва қонун устуворлиги, ҳақиқат ва эркинлик учун кураш олиб бормоқда. Европарламент депутати фикрича, Россиядаги кўплаб фуқаролар Навальнийга хайрихоҳ, аммо улар ўз нуқтаи назарини билдиришдан қўрқишади ва Европа кенгашининг дастагига муҳтож.
Алексей Навальний шу йилнинг январь ойидан бери қамоқда сақланмоқда. Уни Германияда даволаниб қайтган куниёқ ҳибсга олишган ва кейинроқ “Ив Роше” иши бўйича шартли жазони ҳақиқий қамоқ муддати билан алмаштиришган. Суд қарори билан сиёсатчи икки йилу саккиз ой муддатга озодликдан маҳрум этилган.