Шу ой бошида Тожикистон парламенти Тожикистон президенти Имомали Раҳмон таклиф қилган амнистия тўғрисидаги қонун лойиҳасини маъқуллади. Амнистия собиқ совет республикаси 9 сентябрда нишонланадиган мустақилликнинг 30 йиллигига бағишланган. Амнистия асосан аёллар, 18 ёшгача ва 55 ёшдан ошганлар, ногиронлар, оғир касаллар, давлат мукофотлари билан тақдирланганлар, уруш қатнашчилари ва чет эл фуқароларига нисбатан қўлланилади.
Ҳуқуқ ҳимоячиларининг таъкидлашича, амнистия бу қаттиқ назорат остидаги мамлакатда сиёсий маҳбусларга таъсир қилмайди. Икки ой ичида қамоқхоналардан 10 мингдан ортиқ одам озод қилинади ва яна 6 минг маҳбуснинг қамоқ муддати қисқартирилади.
Озоди радиоси («Озодлик» радиосининг тожик нашри) хабар беришича, сешанба куни Явондаги қамоқхонадан 605 маҳбус озод қилинган, яна ўнлаб одамлар Норакдаги аёллар колониясидан озод қилинган ва яқинлари билан учрашган. Хатлон вилояти маркази Боғтордаги колония ходимлари ўтган сешанба куни бир неча маҳбусни қўйиб юборганликларини айтишди, лекин аниқ сонини айтишмади.
Тожикистон Адлия вазирлигининг жиноий жазони ижро этиш бош бошқармаси Озодлик радиосига маълум қилишича, яқин кунларда улар Душанбедаги «Биринчи Совет» колониясидан амнистия қилинганларни озод қилишни бошлайдилар.