Қырғыз билігі тұрғындарды да электр энергиясын үнемдеуге шақырып жатыр. Биыл әсіресе күз-қыс мезгілінде қиын болатынын ескертуде.
Тұрғындар қыста көшелер тым қараңғы болады деп қауіптенеді. Бірақ билік қауіпсіздік үшін көшелердегі жарықтар сөндірілмейді деп уәде береді.
"Біз тек жарнамаларға қатысты мәселе көтеріп жатырмыз. Егер кешкісін қалада серуендесеңіз, барлық кафелер жап-жарық. Кейбірінде 500 шамға дейін жанып тұрады. Мұның бәрі не үшін қажет?", - дейді Ұлттық энергохолдинг басшысы Талайбек Байгазиев.
Қырғызстанда электр энергия бағасы соңғы алты жылдан бері өспеген. Билік әзірге тариф көтеру мәселесін қарастырып жатқан жоқ. Қосымша электр энергияны Өзбекстаннан, Қазақстаннан сатып алып отыр.
"Біз биылғы қыстан аман-есен өтуіміз керек. Биыл Тоқтағұл су қоймасында су деңгейі төмен болып жатқанын білесіздер. Егер су деңгейі тағы түсіп кетсе, ондай елде төтенше жағдай орын алуы мүмкін. Біз халыққа алдын ала ескертіп жатырмыз. Электр жылытудан бас тартыңыздар. Көмір сатып алыңыздар", - дейді Талайбек Байгазиев.