Тәжікстанның "Барки точик" холдингі 5 қазанда Ауғанстанға электр қуатын жеткізу тоқтамағанын мәлімдеді. Холдинг қуат ақысы жақында төленеді деп үміттенеді. Дегенмен "Барки точик" Ауғанстанның "Брешно" компаниясы қанша қарыз екенін айтпады.
"Талибан" қозғалысының содырлары Кабулды алған соң, ауған компаниясы электр қуатының ақысын төлей алмай қалған. Компания оны Ауғанстанда банк жүйесі қалпына келген соң өтеуді көздеп отыр.
Бұған дейін хабарланғандай, Тәжікстан электр қуатының Ауғанстанға экспортын қысқартып, оны Қырғызстанға сата бастаған.
Қырғызстан ақпарат құралдарының хабарлауынша, көрші елге жарық сату туралы бастаманы тәжік билігі бірінші көтерген.