Ссылки доступа

Өзбекстанның Сох анклавында әуежай құрылысы аяқталды


Қырғызстанның Баткен облысымен шектесетін Өзбекстанның Ферғана облысына қарасты Сох ауданында жаңа әуежай құрылысы аяқталды.

Ферғана облыстық әкімшілігі жалпы ауданы 7 гектарды, ұшып-қону жолының ұзындығы 700 метрді алатын әуежайда жақында сынақ үшін ұшақтар ұшырылатынын хабарлады.

Ресми мәлімет бойынша, әуежай құрылысына 7 млрд сум бөлінген.

350 шаршы шақырымды алатын Өзбекстанның Сох анклавы Қырғызстанның Баткен облысының аумағында орналасқан. Өзбекстаннан Сохқа бару үшін Қырғызстан аумағы арқылы 20 шақырымдай жол жүреді.

Анклавты Өзбекстанның негізгі аумағымен байланыстыратын Сох-Риштан тас жолы 2013 жылы қырғыз-өзбек шекарасындағы жанжалдан кейін бір тарапты жабылған. Биыл сәуір айында аталған жолдағы "Қайтпас" және "Өтүкчү" шекара бекеттері ашылып, жолаушылар өткізіле бастаған. Бірақ бұл бекеттер арқылы әзірге жүк көліктеріне тыйым салынған.

Сох ауданы мен қырғыз ауылдары тұрғындары арасында тұрмыс-тіршілік мәселелеріне байланысты жиі жанжал болып тұрады. Олардың соңғысы 2020 жылы мамыр айында Кадамжайдың Чечме ауылы мен Сохтун Чашма ауылы тұрғындарының арасында бұлаққа таластан жанжал шықты. Онда 187 өзбекстандық әрқалай жарақат алып, ауруханаға түскен. Олардың үшеуіне мылтық оғы тиіп, бірнеше үй өртенген.

Ал Қырғызстан тарапы 25 адам түрлі жарақат алып, екі адамның ауыр жағдайда ауруханаға түскенін мәлімдеген.

Өзбекстан президенті осы оқиғадан кейін "2020-2021 жылдары Сох ауданын әлеуметтік-экономикалық дамыту жөнінде" қаулы қабылдады.

XS
SM
MD
LG