Ссылки доступа

Британия дунёда биринчи бўлиб COVID-19 га қарши “ҳапдори”ни маъқуллади


Буюк Британия COVID-19 га қарши ҳапдори қўлланишини маъқуллаган дунёда биринчи мамлакат бўлди.

АҚШнинг Merck ва Ridgeback Biotherapeutics ширкатлари ишлаб чиқарган “молнупиравир” препарати ҳапдори кўринишида бўлиб, уни касалликнинг дастлабки босқичида қўллаш тавсия этилган. Дори, хусусан, соғлиғи хатар остида бўлган гуруҳга мансуб кишилар – сурункали хасталиклар билан оғриган беморлар учун тавсия этилади.

Бу COVID-19 га қарши оммавий фойдаланишга мўлжалланган биринчи препаратдир. Коронавирус инфекциясини даволашга мўлжалланган специфик препаратлар шу пайтгача фақат касалхоналарда оғир аҳволдаги беморларга ёрдам беришда қўлланилган.

Клиник синовлар янги дори соғлиғи хатар остида бўлган гуруҳга мансуб кишиларнинг ковид инфекцияси билан касалхонага тушишини ва ундан вафот этишини тенг ярим ҳиссага камайтириши мумкинлигини кўрсатган.

Британияда, Европанинг бошқа мамлакатларида бўлгани каби, куз бошидан буён коронавирусга чалинганлар сони ортиб бормоқда. Аммо ўлим ҳолатлари ўтган йилдагидан анча кам бўлиб, бу ялпи эмлаш самараси ўлароқ баҳоланмоқда: инфекция оғир кечаётган беморларнинг аксариятини эмланмаганлар ташкил қилади.

XS
SM
MD
LG