Uzbekistan Airports ширкати маълумотига кўра, йўловчилар душанба куни тушдан кейин аэропорт биносида йиғила бошлаганлар, бироқ мазкур рейслар жадвалга қўйилмагани маълум бўлган.
Улар Россиянинг IFly авиаширкати рейсларига авиачипталарни Самарқанд, Бухоро ва Урганч шаҳарларида жойлашган “Восток Бухоро” ширкатининг турли филиалларидан сотиб олганларини айтганлар.
Бунинг ортидан “Навоий” аэропорти ходимлари чипталарни сотган ширкат билан боғланиб, йўловчиларга зарур бўлган барча маълумотни тақдим этиш ҳамда мавжуд вазиятни ҳал қилишни талаб қилганлар. Йўловчилар билан учрашган “Восток Бухоро” ширкати вакиллари уларга чипта пулини қайтаришни ваъда қилган. Шундан сўнг Москва ва Санкт-Петербургга учолмай қолган йўловчилар аэропорт биносини тарк этишга мажбур бўлганлар.
Аввалроқ Истанбулга учиш мақсадида 3 ноябрь куни Тошкент халқаро аэропортига келган 200 чоғли чиптали йўловчи ўзлари парвоз қилишлари лозим бўлган рейснинг жадвалга қўйилмаганидан хабар топишгач, аэровокзалда сарсон бўлишгани ҳақида хабар қилинган. Ўшанда йўловчилар бир муддат кутганларидан кейин, жилла қурса, кўзлаган манзилларига учиб кетишга муваффақ бўлишган эди. Уч юзга яқин йўловчини сарсон қилиш ҳолати 4 ноябрь куни Урганч аэропортида ҳам кузатилган.