10 қараша күні таңертең Польшаның қорғаныс министрі Мариуш Блащак Польша аумағына өткен мигранттардың бәрі ұсталды деп хабарлады. "Бұл тынышсыз түн болды. Мигранттар шекараны бұзуға әрекет жасады", - деді министр. Қазір шекараны 15 мың әскер күзетіп тұр.
Шекарада жағдай 8 қарашада күрт өзгеріп, Еуроодаққа өткісі келген мыңдаған мигрант қоршауларды бұзбақ болған.
Ресми Минск Польша халықаралық талаптарды орындап, мигранттарды өткізу керек деп Варшаваны сынға алып жатыр. Ал Еуропалық одақ болса, Лукашенко билігін сынап, мигранттарды арандатып, қолдан жасап отыр деп мәлімдеді. Себебі Брюссель Лукашенко режиміне қарсы санкция енгізген.
Польша премьер-министрі Матеуш Моравецкий сейсенбі күні парламентте сөйлеген сөзінде мигранттардың әрекетін шекараға жасалған шабуыл деп айтып, бұл ел тұтастығына жасалған қастандық деді. Ол осы оқиғаның артында Ресей тұр деді. Оның сөзінше, Александр Лукашенко Путиннің тапсырмасын орындаушы ғана.
Еуропалық одақ Беларусьқа қатысты жаңа санкция салмақшы. "Қара тізімге" беларусьтың "Белавиа" әуе компаниясы енуі мүмкін. Бұдан бөлек Минскіге ұшатын барлық әуе компаниялар, атап айтқанда "Аэрофлот", UTair және Nordwind Airlines, сонымен бірге Turkish Airlines пен FlyDubai да санкцияға ілінуі мүмкін.