Ссылки доступа

«КазАвтоЖол» еттита йўл участкасида пуллик тўловлар жорий этилишини эълон қилди


23 ноябрь куни Қозоғистонда республика аҳамиятига молик автомобиль йўлларининг еттита қисми пуллик бўлди, деб хабар берди «КазАвтоЖол» автойўл компанияси.

Биринчи тоифадаги автомагистралларнинг тўрт полосалик бўлган еттита участкаси эндиликда пулли бўлди. Булар Нур-Султон — Павлодар, Капшағай — Талдиқўрғон, Тараз — Қайнар, Чимкент — Тараз, Чимкент — Қизилўрда, Чимкент — Тошкент, Шучинск — Кокшетау магистраль йўлларидир. Бугунга қадар автомагистраллардан ҳаракатланиш учун тўлов тизими бир неча ҳафта давомида синов режимида ишлатиб кўрилди.

Юқорида қайд этилган ҳудудлар учун тўловни жорий этиш тўғрисидаги буйруқлар давлат рўйхатидан ўтказилди ва бугундан кучга кирди.

«Ҳозирда пуллик йўлга туташ маъмурий-ҳудудий бирликда рўйхатдан ўтган маҳаллий енгил автомашиналар учун 1 000 тенге (2,3 доллар) бўлган йиллик обунани харид қилиш имконияти мавжуд», — дейилади «КазАвтоЖол» хабарида. Йиллик обунани сотиб олмоқчи бўлганлар учун компания «КазАвтоЖол»нинг веб-сайтидаги жойлашуви кўрсатилган пуллик йўлларга хизмат кўрсатиш марказларига мурожаат қилишни таклиф қилди.

Компаниянинг таъкидлашича, пуллик йўлларда ҳаракатланиш нархи аввалроқ ушбу тизим жорий қилинган йўл участкалари (Нур-Султон – Шучинск, Нур-Султон – Темиртау, Олмаота – Капшағай, Олмаота – Хоргос) билан бир хил бўлади. Пуллик йўлларда юриш учун йиғилган маблағлар, уларнинг таъминоти ва йўл тармоғини ривожлантиришга йўналтирилади.

XS
SM
MD
LG