Қайд этилишича, Акаевнинг сўнгги олти ой ичида Қирғизистон пойтахтига иккинчи ташрифи ҳам «Қумтор иши» тергови билан боғлиқ. Озодлик манбасининг маълум қилишича, собиқ президент мамлакатда бир неча кун қолади ва бу вақт давомида Қирғизистон Миллий хавфсизлик давлат қўмитаси (МХДҚ) саволларига яна жавоб беради.
Асқар Акаев Қирғизистонга илк бор шу йилнинг август ойида келган. Бунгача Миллий хавфсизлик давлат қўмитаси унинг «Қумтор» лойиҳасини амалга оширишдаги коррупция иши бўйича қўзғатилган жиноий тергов доирасида қидирувга берилгани ҳақида хабар берган эди.
Кейин Акаевнинг ўзи ҳам унинг қайтишига Қумтор олтин кони атрофидаги жараёнлар сабаб бўлганини тасдиқлади. Миллий хавфсизлик давлат қўмитасида бир ҳафталик сўроқдан сўнг у мамлакатни тарк этиб, сўнгги 16 йилдан бери яшаб келган Москвага қайтди.
2005 йилнинг 24 мартида Қирғизистонда тартибсизликлар бошланди, натижада 15 йил президентлик қилган Асқар Акаев мамлакатни тарк этишга мажбур бўлди. Акаев ва унинг оиласи Россияга қочиб кетган, у ерда сиёсий бошпана олган ва шу йилнинг августигача ҳибсга олинишидан қўрқиб ватанига қайтмаган.
Қирғизистондаги «Қумтор иши» бўйича бир қанча юқори мартабали амалдорлар коррупцияда айбланиб жиноий жавобгарликка тортилмоқда. Қумтор Қирғизистондаги энг йирик олтин руда кони ҳисобланади. Қумтор мамлакат иқтисодиётининг қарийб тўққиз фоизини ташкил қилади. Қирғизистон раҳбариятининг иддао қилишича, аввалги ҳукумат даврида объект атрофида коррупцияга оид битимлар бўлган. Собиқ амалдорлар ва Канаданинг Centerra Gold кончилик корпорацияси буни рад этади.