«РИА Новости” Қозоғистон Республикаси полициясига таяниб, «6 январга ўтар кечаси полиция биносига ҳужум қилган ўнлаб одамлар ҳалок бўлганини» маълум қилди.
Ички ишлар бошқармаси вакили Салтанат Азербек «Интерфакс»га «жабрланганларнинг шахси аниқланмоқда», деди.
ТАСС ва BBC рус хизмати ҳарбийлар Олмаота марказий майдонини ўраб олиб, махсус операция ўтказгани ҳақида хабар берди. Кейинроқ эса ҳужумчилар қамалга олингани хабар қилинди.
Айни пайтда мамлакатда интернет яна ишламай қолган, ҳукумат сайтлари ва ахборот агентликлари, жумладан Қозоғистондаги Озодлик радиоси блокланган.
5 январь куни кечқурун Қозоғистон Республикаси Ички ишлар вазирлиги Олмаотадаги тартибсизликлар чоғида саккиз нафар полициячи ва Миллий гвардия ходими ҳалок бўлганини маълум қилди.
Кейинроқ Қозоғистон президенти Қасим-Жомарт Тоқаев Олмаотадаги тартибсизликларни «террорчи тўдалар» уюштирганини айтиб, ёрдам сўраб КХШТга мурожаат қилди.
Россия бошчилигидаги КХШТ Қозоғистонга тинчликпарвар кучларини юборишини айтди.
5 январь куни тушда президент Тоқаев ҳукумат истеъфосини қабул қилди. Олмаотада ўнлаб дўконлар ва банклар талон-тарож қилингани айтилмоқда.
5 январь куни соат 17:00 дан ярим тунгача мамлакатда интернет узилди. Тоқаев пойтахтни тарк этмаслиги ва Хавфсизлик кенгашига раҳбарлик қилишини маълум қилди. Илгари кенгашга собиқ президент Назарбоев раислик қилган. Расмийлар фавқулодда ҳолат эълон қилди.