Ўтган йили Ўзбекистонга Moderna вакцинаси 3 миллион дозадан кўпроқ олиб келингани ҳақида Озодлик аввалроқ хабар қилган. Бугунги партия билан мамлакатга келтирилган мазкур вакцинанинг умумий миқдори 3 миллион 500 минг 460 дозани ташкил этган.
ССВ қайдича, Ўзбекистонда фойдаланилаётган вакциналар миқдори шу тариқа 49 миллион 536 минг 768 дозага етган. Бундан (Moderna вакцинасидан ташқари) 2 миллион 404 минг 480 дозасини AstraZeneca, 37 миллион 789 минг 938 дозасини ZF-UZ-VAC2001, 1 миллион 341 минг 790 дозасини “Sputnik V”, 2 миллион 316 минг 600 дозасини Pfizer/BioNTech, 1 миллион 976 минг дозасини Sinovac, 207 минг 500 дозасини Sputnik Light вакцинаси ташкил қилган.
Ўзбекистонда аҳолини коронавирусга қарши эмлаш жараёни ўтган йилнинг апрель ойидан бошланган. Ўтган вақт оралиғида эмлаш тадбирларида, расмий маълумотларга кўра, қарийб 40 миллион доза вакцинадан фойдаланилган.