Раҳматулло Ражаб ва Зубайдулло Розиқ ўтган йилнинг ноябрь ойида Тожикистон президентига ишини қайта кўриб чиқишни талаб қилиб, мактуб йўллаганлари учун жазо камерасига жойлаштирилган эди.
Қариндошларининг айтишича, расмийлар уларнинг қариндошларини қасддан жазо камерасига жойлаштирган, бироқ Адлия вазирлиги Жиноят жазосини ижро этиш бош бошқармаси маҳкумлар жазони ижро этиш муассасаларида белгиланган тартибни бузгани учун у ерга жойлаштирилганини маълум қилган.
Раҳматулло Ражабнинг рафиқаси Валамат Иброҳимзодага кўра, эри телефон орқали суҳбатда улар 9 январь куни жазони ўташ камерасидан камераларига қайтарилганини айтган.
Ҳозирча Ваҳдатдаги янги қамоқхона раҳбариятига қайта-қайта қилган қўнғироқларимиз жавобсиз қолмоқда.
2021 йил ноябрь ойи бошида Тожикистонда тақиқланган Ислом Уйғониш партиясининг қамоқдаги икки фаоли президент Имомали Раҳмондан уларнинг ишини «халқаро экспертлар ва кузатувчилар, шунингдек, маҳаллий ва хорижий журналистлар иштирокида» қайта кўриб чиқишга кўмаклашишни сўради. Бу мактуб илк бор Европанинг мухолифатга яқин матбуотида чоп этилган.
Мактубда Зубайдулло Розиқ ва Раҳматулло Ражаб ўзларини «айбсиз айбдор» деб атаган ва олти йилдан бери бежиз панжара ортида азоб чекаётганликларини ёзишган. «Бундан ташқари, бизни экстремист ва террорчи, миллат ва ватан хоинлари сифатида қоралашмоқда», — дейди улар.
Зубайдулло Розиқ 25 йилга, Раҳматулло Ражаб эса 28 йилга озодликдан маҳрум этилди. Расмийлар уларни 2015 йил сентябрида мудофаа вазирининг собиқ ўринбосари генерал Абдуҳалим Назарзод қўзғолонида иштирок этганликда айблади.
Маҳкумлар президентга йўллаган мактубида, «Бизни Хўжа Ҳалим қўзғолони ташаббускори деб ҳисоблашлари бутунлай манфаатдор томонларнинг уйдирмаси. Сиз, Жаноби Олийлари, қўзғолон нима сабабдан ва нима учун бўлганини жуда яхши биласиз» дейилади.
Тожикистон ҳукумати 2015 йил 4 сентябрдаги «Хўжа Ҳалим исёни» деб номланувчи ТИУПни уюштирганликда айблаб, шу кунгача Тожикистонда тақиқланган ушбу партиянинг ўнлаб аъзолари ва фаолларини ҳибсга олиб, қамоққа ташлаган.
Ҳозир мамлакатдан ташқарида бўлган партия етакчилари олти йил аввалги воқеаларга алоқадорликларини рад этиб, ҳукумат бундан «иккинчи йирик сиёсий партия»ни Тожикистон сиёсий саҳнасидан олиб ташлаш учун баҳона сифатида фойдаланмоқда, деб ҳисобламоқда.