Эслатиб ўтамиз, аввалроқ Қирғизистон Қуролли кучларининг тинчликпарвар ҳарбий контингенти Олмаотадаги ИЭС-2 ни қўриқлаётгани хабар қилинганди.
11 январь куни Қозоғистон президенти Қасим-Жомарт Тоқаев КХШТ давлатларидан қўшинларни олиб чиқиш шу ҳафта бошланиши ва 10 кундан кўп бўлмаслигини маълум қилди.
«КХШТ тинчликпарвар контингентининг асосий миссияси якунланди. Икки кундан кейин тинчликпарвар контингентни олиб чиқиш бошланади. КХШТ қўшинлари 10 кун ичида олиб чиқилади», — деди Тоқаев мажлисда.
7 январь куни Жогорку Кенеш депутатлари навбатдан ташқари йиғилишда Қозоғистонга ҳарбий хизматчилар жўнатишини маъқуллади. Миллий хавфсизлик давлат қўмитаси раиси Қамчибек Ташиев 150 нафар ҳарбий хизматчи, 8 та бронетехника ва 11 та техникани юбориш таклиф этилганини маълум қилди.
Муҳокама чоғида парламент биноси олдида Қозоғистонга ҳарбий хизматчиларни юбормаслик талаби билан пикет ўтказилди.
КХШТ контингенти Қозоғистонга Қозоғистон Республикаси Президенти Қасим-Жомарт Тоқаевнинг илтимосига биноан мамлакатдаги оммавий норозилик намойишлари ва тартибсизликлар муносабати билан келди. Ташкилот Қозоғистонга бир неча минг ҳарбий хизматчи жўнатган.
Қозоғистонда қаттиқ назорат остидаги авторитар мамлакатда ислоҳотлар ўтказишга чақирган намойишлар зўравонликларга айланди. Юзлаб одамлар ҳукумат биноларига бостириб кириб, уларнинг бир қисмига ўт қўйган, савдо нуқталари ва хизмат кўрсатиш дўконларини талон-тарож қилган, автомобилларга ўт қўйган ва ағдарган. Бунга жавобан Тоқаев 19 январга қадар комендантлик соати, ҳаракатланишни чеклаш ва оммавий тадбирларни тақиқлаш билан фавқулодда ҳолат жорий этди.
10 январь куни КХШТ давлатлари раҳбарларининг виртуал учрашувида Тоқаев «террорчилар»ни суюлтирилган газ нархи ошиши туфайли юзага келган тартибсизликлар чоғида ҳокимиятни эгаллаб олишга уринганликда айблади. У ўз даъвосини тасдиқловчи далиллар келтирмади, лекин ҳукуматнинг тинч намойишчиларга ҳужумлари ҳақидаги баъзи ҳисоботлар ва гувоҳларнинг сўзларини «дезинформация» деб таърифлади.
10 январь куни Европа кенгаши президенти Шарл Мишел билан телефон орқали суҳбатда Тоқаев сўнгги воқеалар Марказий Осиё, Афғонистон ва Яқин Шарқдан келган «жангарилар» иштирокидаги «яхши ташкил этилган босқинчилик акти» эканлигига шубҳа қилмаслигини айтди.