Ссылки доступа

Қозоғистон парламенти Нурсултон Назарбоевнинг Хавфсизлик кенгашига умрбод раислиги бекор қилинишини маъқуллади


Қозоғистон парламенти Мажлиси 19 январь куни бўлиб ўтган ялпи мажлисда Қозоғистоннинг биринчи президенти Нурсултон Назарбоевнинг Қозоғистон халқи ва хавфсизлик ассамблеясига умрбод раислик қилишини бекор қилишни назарда тутувчи қонун лойиҳасини маъқуллади.

Қозоғистон парламенти мажлиси матбуот хизматининг аниқлик киритишича, бу ўзгартиришлар чоршанба куни «Сиёсий партиялар тўғрисида»ги қонунга ўзгартишлар киритиш тўғрисида»ги қонун лойиҳасида палата томонидан маъқулланган.

5 январь куни Қозоғистондаги оммавий норозилик намойишлари фонида президент Тоқаев қонун бўйича Назарбоев умрбод раҳбарлик қилиши керак бўлган Хавфсизлик кенгаши раислигига ўзи келганини эълон қилди.

Бундан ташқари, Назарбоев билан яқин алоқада бўлган бир қанча юқори мартабали амалдорлар ўз лавозимларидан четлаштирилди. Шундан сўнг ижтимоий тармоқлар ва оммавий ахборот воситаларида Назарбоев ва унинг вориси ўртасида ҳокимият учун кураш бўлаётгани ҳақидаги иддаолар пайдо бўла бошлади.

Бироқ Назарбоевнинг матбуот котиби Айдос Укибайнинг сўзларига кўра, «вазият жуда оғир бўлган», шунинг учун Назарбоев «ўзи Хавфсизлик кенгаши раислик лавозимини президентга топширишга қарор қилган.

Укибай, шунингдек, Назарбоев ва Тоқаев ҳар доим «баррикадаларнинг бир томонида» бўлишганини таъкидлаб, улар ўртасида гўёки бўлиниш борлиги ҳақидаги миш-мишларнинг тарқалишини сиёсий вазиятни беқарорлаштириш ва давлатнинг конституциявий асосларини бузишга уриниш деб атади.

Шунга қарамай, мамлакатдаги норозилик намойишларидан сўнг Қозоғистон биринчи президентининг қариндошлари ва яқинлари лавозим ва мансаблардан маҳрум этила бошланди. 19 январь куни Қозоғистон ҳукумати собиқ президентнинг кенжа қизи Алия Назарбоева билан алоқадор бўлган РОП Оператор компаниясини қайта ишлаш учун тўлов олиш ҳуқуқидан маҳрум қилгани ва давлат ташкилотини янги оператор этиб тайинлагани маълум бўлди.

Хавфсизлик Кенгаши миллий хавфсизлик ва мудофаа соҳасидаги давлат сиёсатини мувофиқлаштирувчи конституциявий органдир. Тоқаев 5 январь куни Сосбез раиси лавозимини эгаллади. Ўша куни у давлат тўнтаришига уриниш ҳақида эълон қилиб, мамлакатда фавқулодда ҳолат эълон қилди ва тартибсизликларда «халқаро террорчи тўдалар»ни айблаб, Россия бошчилигидаги КХШТ ҳарбий блокидан ҳарбий ёрдам сўради. КХШТ мамлакатга 2000 дан ортиқ аскар юборган.

XS
SM
MD
LG