Бу ҳақда Россия парламенти қуйи палатаси раиси Вячеслав Володин ўзининг телеграм-каналида маълум қилди.
Унинг сўзларига кўра, Украина президенти Владимир Зеленский Минск келишувларини менсимайди, НАТО эса «Украинани босиб олмоқчи». «Бири ҳам, иккинчиси ҳам фожиага айланиши мумкин. Биз бунга йўл қўймаслигимиз керак», — дея таъкидлади Володин ва Москва ўзини «ЛПР» ва «ДХР» деб эълон қилган ватандошларни ҳимоя қилиш йўлини излаши кераклигини қўшимча қилди.
Чоршанба куни Коммунистик партия фракцияси депутатлари, шу жумладан унинг раҳбари Геннадий Зюганов Давлат Думасига палата қарори лойиҳасини тақдим этдилар.
Мурожаат матнида айтилишича, Украина расмийлари Украинанинг Луганск ва Донетск вилоятлари аҳолисининг «тарихий шаклланган ҳаёт нормаларига, шунингдек, иродаси ва динига нисбатан муросасиз муносабатда бўлишган». Муаллифлар Киев сиёсатини «ўз халқининг геноциди» билан солиштиришни таклиф қилмоқдалар.
Путинга мурожаат Россия ва Украина ўртасидаги чегарадаги вазиятнинг мисли кўрилмаган кескинлашуви фонида қилинган. Кўпгина манбалар минтақада рус қўшинларининг муҳим гуруҳи тўплангани ҳақида хабар беради. Ғарб расмийлари Москвани кенг кўламли ҳарбий босқинга тайёргарлик кўраётганликда гумон қилмоқда. Кремль буни қатъиян рад этади.
Бир кун аввал Давлат департаменти Россия томонининг Украина бўйича можаро баёнотлари рўйхатини эълон қилди, Вашингтон буни нотўғри маълумот деб билади. Россия ўз фуқароларини Украина ҳудудида ҳарбий операция ўтказиш зарурлигига ишонтирмоқчи, Киев ва Ғарб давлатларини глобал можаро қўзғатиш ниятида айбламоқда, дея таъкидлайди Давлат департаменти.
Москва Украина билан чегарада 100 мингдан ортиқ аскарни жойлаштириш орқали ҳозирги инқирозни қўзғатди, чегаранинг Украина томонида бундай ҳарбий ҳаракатлар амалга оширилмади. «Россия ўзининг тажовузкорлигида бошқаларни айблайди, бироқ айнан Москва бу инқирозни тинч йўл билан деэскалация ва дипломатия йўли билан тугатиши керак», — дея таъкидлади АҚШ Давлат департаменти.