Ҳокимлик олдига чиққанлар қўлларига «Халқ экстремист эмас!», «Қатағонни тўхтатишни талаб қиламиз!», «Қонунсизликка йўл қўймаймиз!» деган ёзувлар туширилган плакатларни ушлаб туришган. Акция тахминан 15 дақиқа давом этди. Унинг иштирокчиларидан бири Алма Карашаеванинг айтишича, полиция уни ён томондан кузатган, машина ичидан суратга олган.
Биз жим туролмаймиз. Бу мумкин эмас. Тинч митингга чиққан оддий одамлар қандай таъқиб қилинаётганини ҳар куни эшитаяпмиз. Шунинг учун биз уларни қўллаб-қувватлашга қарор қилдик, — дейди Карашаева.
Жума куни “Кезби” ширкати ишчилари томонидан худди шундай талаб билан видеомурожаат ёзиб олинган. Ўнлаб одамлар тинч намойишчиларни таъқиб қилиш давом этса, ишчилар митингга чиқишга тайёр эканини айтади.
Кезби ишчилари номидан ушбу мурожаатни ўқиб чиққан нефтчи Нурсултон Нуримов шанба куни полицияга келишни талаб қилувчи чақирув қоғозини олди. Унинг сўзларига кўра, чақирув қоғозида жиноий иш бўйича гувоҳ экани кўрсатилган.
20 январь куни Жанаўзенда видеочалленж бошланди, унда иштирокчилар тинч намойишчиларни таъқиб қилмаслик ва ҳибсга олинган фаолларни қийноққа солмасликка чақирмоқда.
Январь воқеалари Қозоғистонда Жанаўзенда газ нархининг кескин ошиши сабаб норозилик намойишлари билан бошланди. Кейин митинглар аксарият ҳудудларни қамраб олди ва иқтисодий талабларга қаттиқ назорат остидаги мамлакатда ислоҳотлар ўтказиш талаблари қўшилди. Халқ собиқ президент Нурсултон Назарбоевнинг сиёсатдан кетишини, унинг тарафдори Қасим-Жомарт Тоқаевнинг истеъфога чиқишини ва янги демократик сайловлар ўтказилишини талаб қилди.
Халқаро инсон ҳуқуқлари ташкилотлари январь ойининг биринчи ҳафтасида мамлакатда содир бўлган воқеалар ва ҳибсга олинганлар тақдири ҳақида ахборот беришда шаффофлик йўқлигидан хавотир билдирмоқда. Улар Қозоғистон расмийларини барча мавжуд маълумотларни ошкор қилишга, ноқонуний ҳибсга олинганларни озод қилишга ва маҳбуслар ҳуқуқларини ҳурмат қилишга чақирмоқда.