Ал-Арабия телеканалига кўра, СДК отрядлари АҚШ ҳарбийлари кўмагида ИШИД жангарилари биноларнинг бир қисмини ушлаб туришда давом этаётган Ал-Ҳасакадаги қамоқхонага навбатдаги ҳужум уюштирган. Бу қамоқхонада 3,5 мингдан ортиқ маҳбуслар, жумладан ИШИД сафларида жанговар ҳаракатларда қатнашган ёлланма аскарлар сақланади. 23 январь куни баъзи оммавий ахборот воситалари курд жангарилари Қўшма Штатлар кўмагида қамоқхона назоратини тиклаб олишга муваффақ бўлганини хабар қилган эди.
20 январь куни ИШИД жангарилари Ал-Ҳасака ҳудудига кириб борган ва у ерда жойлашган Ас-Сина қамоқхонасига бостириб киришга ҳаракат қилган. ОАВ маълумотларига кўра, ҳужумчилар маҳбусларнинг қочишини осонлаштириш учун жазони ўташ муассасаси ҳудудига кираверишда иккита бомба ўрнатилган автомобилни портлатиб юборган.
АҚШ ИШИД жангариларининг ҳибсга олинган экстремистларни озод қилиш учун Суриянинг Ал-Ҳасака шаҳридаги қамоқхонага уюштирган ҳужумини қоралади. Бу ҳақда Давлат департаменти матбуот хизмати раҳбари Нед Прайснинг агентлик сайтида чоп этилган баёнотида айтилади.
Лондонда жойлашган Сурия Инсон ҳуқуқлари мониторинги маркази маълумотларига кўра, курд махсус кучлари бир неча кунлик жангларда ИШИДнинг 77 жангчисини йўқ қилган, СДК жангарилари орасида қурбонлар сони 39 нафарга етган. Улардан камида 7 нафари тинч аҳоли вакили бўлган.
Аввалроқ курд ҳукумати 3,5 минг киши, жумладан, террорчилар сафида жанговар ҳаракатларда қатнашган ёлланма аскарлар сақланаётган Ас-Синадаги қамоқхонани бошқаришга қодир эмаслигини эълон қилган эди.
СДК қўмондонлиги баёнотида Туркия ва унинг томонида жанг қилаётган Сурия мухолифати қуролли кучлари қамоқхонани эгаллаб олган ИШИД тўдасига ёрдам берганини даъво қилмоқда.
ОАВ маълумотларига кўра, ИШИД 2017 йилда Ироқда мағлубиятга учраганига қарамай, гуруҳ жангарилари ҳозирда Суриянинг бир қанча ҳудудларини ўз назорати остида ушлаб туришга муваффақ бўлмоқда. Мутахассисларнинг қайд этишича, ИШИД Суриянинг янги ҳудудларини қўлга киритиш учун жанговар ҳаракатларни тиклашга ҳаракат қилади.