Марказнинг бўлимга айлантирилиши бир ой олдин маълум бўлган эди, ўшанда ушбу марказ беморлари ҳам бу қарорга қарши чиқишган.
Аёлларнинг таъкидлашича, улар учун бу касалликка қарши курашиш қийин, баъзилари қиммат дори-дармонларни сотиб олиш учун бутун мол-мулкини сотишга мажбур.
«Бечора аёллар маммология марказида даволандилар, улар орасида ҳатто йўлга пули ҳам йўқлар бор эди. Бу аёллар мамлакатнинг турли бурчакларидан келишди. Бу марказда энг яхши шифокорлар ишлаган. Улар бизни даволаш учун чет элга боришдан ҳам бош тортишган. Бу марказни ёпиш мумкин эмас!», деди митинг иштирокчиларидан бири.
Аёлларнинг таъкидлашича, ҳозирда кўкрак бези саратони билан касалланган 3 мингга яқин аёл рўйхатга олинган, ҳар йили 400 га яқин янгиси аниқланмоқда. Беморларнинг сўзларига кўра, уларга тиббий кўрикдан ўтадиган, даволанадиган марказ керак.
«Бугун мен Онкология марказида бўлдим, тестлардан ўтдим. Аммо навбат жуда узун. 17 февраль куни ультратовуш текширувини тайинладим. Бунинг учун қанча тўлашим кераклигини ҳали билмайман. Марказимиз бўлганида бугун ўша ерда текинга ультратовуш текширувидан ўтган бўлардим. Биз вақтни беҳуда ўтказяпмиз, бу бизнинг касаллигимиз учун жуда қимматли», — деди митингнинг яна бир иштирокчиси.
Бир ой олдин кўкрак бези саратонига чалинган аёллар кўкрак марказини ёпмасликни сўраб, соғлиқни сақлаш вазири Алимқодир Бейшеналиев ва президент Садир Жапаровга мурожаат қилган эди.
Маммология марказининг бўлимга айлантирилиши 2021 йил охирида маълум бўлди. Соғлиқни сақлаш вазирлиги ушбу ташаббусни Миллий онкология маркази тузилмасини оптималлаштириш нияти билан изоҳлади. Оптималлаштириш ғояси тарафдорлари ўзгартириш тақдим этилаётган хизматлар сифатига таъсир қилмаслигини таъкидладилар. Соғлиқни сақлаш вазири Алимқодир Бейшеналиев январь ойи охирида маммология марказини тугатиш тўғрисидаги буйруқни имзолаган эди.