Беларусь расмийлари иддаосича, “Любовский миллий низо ва ижтимоий адоват қўзғатишга қаратилган нотўғри маълумотни қасдан тарқатган” ҳамда “Беларусь Республикасининг юқори рутбали мансабдорларини таҳқирлаб, уларга туҳмат қилган”.
Жорий йилнинг 26 январь куни Варшава округ суди Nexta асосчиси Степан Путилони Беларусга экстрадиция қилиш тўғрисида Минск расмийлари талабномасини кўриб чиққан. Беларусь расмийлари мазкур телеграм-канални 2020 йилда Александр Лукашенко режимига қарши Минскда ўтказилган норозилик чиқишлари чоғидаги “оммавий тартибсизликлар”нинг ташкилотчиси деб ҳисоблаганлар. Судья Любовский “психопат диктатор истагани учунгина” одамни экстрадиция қилиш мумкин эмаслигини билдириб, Путилони Минскка топширмаслик тўғрисида қарор чиқарган эди.
Ўтган йилнинг май ойида Nexta телеграм-каналининг ҳаммуассиси Роман Протасевич ҳибсга олинган эди. Бунинг учун Беларусь расмийлари Протасевич ва унинг ўртоғи Софья Сапега учиб кетаётган учоқни Минскка мажбуран қўндиришган эди. Ирландиянинг Raynair авиаширкатига тегишли учоққа бортда гўё портлаш хавфи бўлгани қўниш буюрилган. Кейинчалик бомбага оид хабар расмийлар махсус амалиётининг бир қисми бўлгани аён бўлган.
Протасевич ва Сапеганинг қўлга олиниши Ғарбда кескин танқидларга сабаб бўлган – Минск учоқни олиб қочганлик ва одам ўғирлаганликда айбланган. Бунинг ортидан Беларусь расмийларига қарши янги санкциялар жорий қилинган. Кейинроқ Беларусь телевидениеси орқали мухолифатни танқид қилган Протасевичнинг чиқишлари бир неча бор намойиш қилинган, шундан сўнг у ва Сапега тергов ҳибсхонасидан чиқарилиб, уй қамоғига олинган.