Мусбат тестлар сони ортаётганига қарамай, Олимпиада чоғида коронавирус тарқалишини назорат қилиш бошқармаси вазият “назоратда” эканини таъкидламоқда.
“Хитойга тобора кўпроқ одамлар ташриф буюраётгани муносабати билан четдан COVID-19 кириб келиши ҳоллари кўпаймоқда”, деган журналистларга бошқарма бошлиғи Хуань Чунь. У вирус юқтириш ҳолатлари кўпайганини “касалликни аниқлашнинг анча самарадор ва илғор усуллари қўлланаётгани” билан боғлаган.
31 январь куни Хитойда бир суткада расман 66 киши коронавирус юқтиргани қайд этилган, улардан 24 нафари Олимпиадага алоқадор шахслардир. Бир кун аввал мамлакатда кундалик кўрсаткич 58 та ҳолатни ташкил этган.
Мусобақа ташкилотчилари томонидан кучайтирилган профилактика чоралари кўрилаётгани, жумладан, спортчиларнинг томошабинлар ва ташкилий қўмита аъзолари билан яқиндан мулоқот қилишини мумкин қадар чеклаш режаланаётгани айтилмоқда.
Хитой пойтахти аэропортига келиб тушганидан сўнг топширган тести натижаси мусбат чиққан кўплаб атлетлар Олимпиададан четлатилган. Янада кўпроқ спортчилар эса уларда коронавирус симптомсиз кечаётгани туфайли яккаланди, деб ёзган “Рейтер” агентлиги.
Қишки Олимпия ўйинлари 20 февралга қадар давом этади. Декабрь ойида АҚШ, Австралия, Канада ва Буюк Британия Хитой ҳукумати мусулмон уйғурлар ҳуқуқларини поймол қилаётгани сабабли Олимпиадага дипломатик бойкот эълон қилган эди.
АҚШнинг аввалги президенти Дональд Трамп COVID-19 пандемияси учун жавобгарлик Хитой ҳукумати зиммасида эканини айтган. Расмий Пекин эса касалликнинг келиб чиқишига доир ҳақиқатни яшириш билан боғлиқ айбловларни қатъиян рад этган.