Намойишчилар Тоқаевга йўллаган мурожаатида, Жанаўзен шаҳри маъмурияти томонидан 2020 йилда тақдим этилган бандлик схемалари рўйхати адолатсиз амалга оширилаётгани сабабли маҳаллий ҳокимият органларига ишончсизлик билдиришларини айтишган.
«Биз нефть ва газ соҳасида барча ишсиз фуқароларни истиқболли ва барқарор иш учун ишга жойлаштиришни талаб қиламиз», дейди пайшанба куни Жанаўзен аҳолиси.
Жанаўзен маъмурияти намойишчилар талабига изоҳ бермади. Пайшанба куни кечқурун Озодликка берган жавобида Манғистау вилояти ҳокимлиги аҳоли бандликка кўмаклашиш марказидаги бўш иш ўринларини рад этиб, фақат нефть-газ соҳасида ишлашни талаб қилаётганини айтди. «Тушунтириш ишлари давом эттирилади», — дейилади ҳокимлик ахборотида.
1 февраль куни жанаўзенликлар Марат Жангаштиев, Ақжол Шами ва Асилбек Бейсембай Нур-Султонда нефть қазиб олувчи Манғистау вилоятидаги моношаҳардаги ишсизлик даражаси юқорилигига ҳукумат эътиборини қаратиш мақсадида пикет ўтказдилар.
Гарчи улар билан Меҳнат вазирлиги вакиллари учрашган бўлсада, Марат Жангаштиевнинг айтишича, бу борадаги муаммолар ҳамон ҳал этилмаган. Унинг сўзларига кўра, 2 февраль куни у яна пикетга чиққан ва у ерда ҳибсга олинган. У Есил тумани милиция бўлимига олиб кетилиб, бир неча соат ушлаб турилган ва қўйиб юборилган.
Жанаўзендаги ишсизлик энг кескин муаммолардан бири. 2019 йилда одамлар бир неча ой иш талаб қилиб кўчаларга чиқди. Жанаўзендаги ишсизлик муаммосини кўтарган фаол Ержан Елшибоев ўша йили ҳибсга олиниб, беш йилга қамалган эди. Елшибоевга 2017 йилда шаҳарда норозилик ўтказган муштлашув бўйича «тана жароҳати етказиш» айби қўйилган, терговга кўра, фаол бир кишига жароҳат етказган. Елшибоев ўзига қўйилган айбловни рад этиб, буни фуқаролик фаоллиги учун таъқиб деб атади. Қозоғистонлик ҳуқуқ ҳимоячилари бу ишни сиёсий мотивлар, деб аташади. 2019 йил августида улар Ержан Елшибоевни «сиёсий маҳбуслар» рўйхатига қўшган.
Жанаўзен аҳолиси 160 мингга яқин. “Ўзенмунагаз” Жанаўзендаги энг йирик ишлаб чиқариш корхонасидир. У 16 та таркибий ва ишлаб чиқариш бўлимига эга. Корхонада тўққиз мингдан ортиқ киши ишлайди. Компания Ўзен ва Карамандибас нефть ва газ конларини ўзлаштирмоқда.