Россия ТИВ хабарномасида немис медиаширкатига қарши ҳаракатлар RT ёйини ман этилганига нисбатан жавобнинг “биринчи босқичи” деб аталган. Ҳукумат Deutsche Welle’ни “хорижий агент ОАВлар” рўйхатига киритиши кутилмоқда. Шунингдек, Москва Россияга келиши тақиқланган немис мулозимлари рўйхатини тузади.
1 февраль куни Германия медиарегулятори RT ёйинини тақиқлаган эди. Россия давлат телеканалида бунинг учун лицензия бўлмаган. Германия қонунчилиги мамлакат ҳудудида бошқа мамлакатлар давлат ОАВларининг ёйин билан шуғулланишини ман этади.
RT телеканалининг Германиядаги фаолияти масаласи Россия ташқи ишлар вазири Сергей Лавровнинг германиялик ҳамкасби Анналена Бербок билан учрашувида муҳокама қилинган. Бербок хоним регулятор қабул қилган қарорга Германия ҳукуматининг дахли йўқлиги, ёйин эса қонунчиликка биноан тақиқланганини айтган.
Deutsche Welle бош директори Петер Лимбург Россия ҳукумати мутлақо номутаносиб муносабат билдирганини айтган. У Германияда россиялик журналистлар ўз ишини давом эттириши учун монелик йўқлигини урғулаган.
“ОАВлар билан боғлиқ бунақа воқеалар фақат автократия режимларида бўлади. Биз ушбу бемаъни қарорга нисбатан расмий норозилик билдирамиз ва унинг устидан судга мурожаат қилмоқчимиз”, деган Лимбург.