Музокаралар асосан Украина атрофидаги вазият ва Москва НАТОдан сўраган хавфсизлик кафолатларига бағишланди.
Владимир Путин учрашувни фойдали ҳамда мазмунли деб атади ва Эммануэл Макроннинг айрим ғоялари яқин кунларда қабул қилинадиган кафолатларни таъминлаш бўйича кейинги қўшма қадамлар учун асос бўлиши мумкинлигини таъкидлади. Етакчилар Макроннинг Киевга ташрифидан кейин қўнғироқ қилишга келишиб олдилар, сафар сешанба куни бўлиб ўтиши режалаштирилган.
Путин Украинанинг НАТОга қўшилиши келажакда Европада кенг кўламли уруш бошланишини англатиши мумкинлигини бир неча бор таъкидлади. Россия президентининг сўзларига кўра, Альянс Россияни рақиб сифатида белгилайди, Украинанинг НАТОга кириши ва Қрим устидан назоратни қайта тиклашга уринишлари Европа давлатларини автоматик равишда Россия билан ҳарбий можарога тортади – чунки улар иттифоқчи тарафга чиқишга мажбур бўлади.
Владимир Путин Москва «томонларнинг ҳар бирига мос келадиган муросага эришиш учун ҳамма нарсани қилади» деб ишонтирди.
Франция президенти, ўз навбатида, Путиннинг айрим масалалар бўйича қарашлари ЕИ мамлакатлари позициясидан фарқ қилишини таъкидлади. Хусусан, Макрон НАТОнинг «очиқ эшиклар» сиёсатини ташкилот мавжудлиги учун зарур деб ҳисоблайди ва Европада янги хавфсизлик архитектурасини яратиш, унинг сўзларига кўра, ҳар бир алоҳида давлатнинг НАТОга аъзолик ҳуқуқини эътибордан четда қолдира олмайди. Бундан ташқари, янги хавфсизлик кафолатлари устида ишлашни эски шартномаларга риоя қилмаслик шароитида олиб бориш мумкин эмас, деди Макрон.
Шунингдек, у Путин билан музокаралар келишувларни англатмаслигини, бироқ Франция президенти мулоқот бошланганидан хурсанд эканини айтди. Муҳокама қилинган таклифлар орасида Макрон Россия ва Ғарб ўртасида янги ҳарбий ҳаракатларга бормаслик, янги стратегик мулоқотни бошлаш ва Украина шарқидаги можарони ҳал қилиш жараёнини жонлантиришга қаратилган умумий ваъдани санаб ўтди.
Макрон ўтган ҳафтада Путин билан уч марта телефон орқали Украина атрофидаги вазият ва Россиянинг хавфсизлик кафолати деб аталмиш талаблари ҳақида гаплашган. Сешанба куни Франция раҳбари Киевга ташриф буюради.
Бир кун аввал Германия канцлери Олаф Шолс АҚШга ташриф билан келди. Германия лидери келаси ҳафта Киевга, кейин эса Москвага ташриф буюриши кутилмоқда.
Франция ва Германия, Россия ва Украина билан бир қаторда, Донбассдаги можарони тинч йўл билан ҳал этиш муҳокама қилинадиган Норманд формати деб аталадиган формат иштирокчиларидир. Бу 4 давлат, хусусан, мулоқот учун асос ҳисобланган Минск келишувларини имзоладилар, гарчи томонлар уларнинг айрим қоидаларини талқин қилишда турлича ёндашувларга эга.