Фаол Facebook саҳифасида Бош прокуратурага бу борада юборган сўровига олинган расмий жавобни эълон қилган.
Унда Бош прокуратура “тергов сири” бўлгани учун ҳалок бўлганларнинг исмлари ошкор этилмаслигини билдирган.
“15 январь куни Бош прокуратура январь воқеаларида 255 фуқаро ҳалок бўлгани тўғрисида хабар берган. Бундан бошқа маълумотлар Жиноят-процессуал кодексининг 201-моддасига асосан айни пайтда ошкор этилмайди”,-дейилади Бош прокуратура жавобида.
Ҳукумат шу кунгача январь воқеаларида ҳалок бўлганлар рўйхатини эълон қилган эмас. Ҳукуматнинг иддао қилишича, ҳалок бўлганларнинг бир қисми “қуролли жангарилар” бўлган. Тинч аҳоли орасида ҳалок бўлганларнинг аниқ сони ҳам сир сақланмоқда.
“Ар.Рух.Хак” ташкилоти фаоллари шу кунгача норасмий равишда ҳалок бўлганлардан 173 кишининг шахсини аниқлашга муваффақ бўлган.
Фаоллар ҳукуматни бир неча маротаба ҳалок бўлганлар рўйхатини эълон қилишни талаб қилди. Бироқ қозоқ ҳукумати шу кунгача бу талабни инобатга олмай келаётир.