Қайд этилишича, ҳоким ўринбосари Оққўрғон туманида жойлашган фермер хўжалигига тегишли бўлган суғориладиган 35 гектар ер майдонини сотиш ва ҳужжатларни туман ҳокимлигида ишловчи танишлари орқали расмийлаштириб бериш эвазига келишилган 90 минг АҚШ долларидан 40 минг АҚШ долларини олган вақтида қўлга олинган. Мулозим билан биргаликда ер олди-соттиси билан шуғулланувчи “маклер” ҳам қўлга олингани айтилмоқда.
Бош прокуратура маълумотига кўра, мазкур ҳолат юзасидан Ўзбекистон Жиноят кодексининг 229-6-моддаси (Суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш) билан жиноят иши қўзғатилган, гумонланувчи процессуал тартибда ушланган.
Бундан уч кун муқаддам Озодлик Қашқадарё вилояти Миришкор тумани ҳокимининг маҳалла ва оилани қўллаб-қувватлаш масалалари бўйича ўринбосари 50 минг доллар пора олаётганида қўлга тушгани ҳақида хабар қилган эди.